AbeMidlands sebekulungele ukuqala kweyeChampionship

USIHLALO nomqeqeshi weMidlands Wanderers, uVincent “Masenti” Myeni, ubona  sebekulungele ukuqala kwesizini ka-2025/26 yeMotsepe Foundation Championship eqala kule mpelasonto.

IMidlands iphakathi kwamaqembu amathathu akhushulelwe kwiMotsepe Championship ngokuphumelela kumaPlay-Offs kazwelonke eSafa ABC Motsepe ngoJuni. Amanye yi-The Bees FC yaseMpumalanga neGomora United yaseGauteng.

IMidlands yaseMgungundlovu izovula isizini yeChampionship, eqala kusasa, ngomdlalo wasekhaya neHungry Lions, eHarry Gwala Stadium, eMgungundlovu, ngeSonto ngo-3 ntambama. 

“Sijabule ngendlela ahambe ngayo amalungiseleo ethu okuqala kwesizini yethu kwiMotsepe Championship. Ngingasho ngaphandle kokungabaza ukuthi sesikulungele ukuqala kwesizini.

Phezu kokulahlekelwa ngabanye abadlali bethu abamqoka abasayiniswe ngamaqembu ePremiership, akuzwelanga kangako ngoba vele siyiqembu elikholelwa kakhulu kubadlali abasebancane abasalambele ukuzakhela igama ebholeni," kusho uMyeni, olekelelana noThulisani “Gattuso” Latha ekuqeqesheni leli qembu. 

"Azikho izinguquko eziningi esizenzile eqenjini ngabadlali esibasayinisile ngoba asikholelwa ekusayiniseni iningi labadlali asebephelelwe wushatini emaqenjini ePSL ngoba sithi silandela isipiliyoni. Sikwazile ukugcina iningi labadlali bethu ebesinabo ngesizini edlule esikholwa wukuthi bazokwazi ukuhlangana kahle nalaba esibasayinisile."

Abafana Bebatha balahlekelwe ngabadlali abayisithupha, bonke abasayiniswe yiLamontville Golden Arrows, okunguNtandoyenkosi Mabaso, Siboniso Madonsela, Philani Khumalo, Nhlanhla Gasa, Alwande Booysen noMfanuvela Mafuleka.

Basayinise uSiyabonga “Sihluthu” Khumalo, Blessing Mchunu abebedlalela i-Arrows, uKhulekani Shezi osuka kwiSekhukhune United, Sanele Gaxa osuka kwiDurban City, Smiso Gumede osuka kwiRoyal AM, noSandile Mkhwanazi osuka kuMkhambathi FC edlala kwiSafa KZN ABC Motsepe League.

Ngakolunye uhlangothi, iMilford FC engelinye lamaqembu aKwaZulu-Natal adlala kwiChampionship, lizovula isizini ngomdlalo wasekhaya neLerumo Lions, eMhlathuze Sports Complex, eRichards Bay, ngoMgqibelo ngo-3 ntambama.

IMilford eqede isizini isendaweni yesithupha kwi-log yeChampionship izobe idlalela okokuqala esizindeni sayo, eMhlathuze, njengoba kumasizini amabili edlule ibisebenzisa iPrincess Magogo Stadium, KwaMashu. 

Imidlalo yeMotsepe Foundation Championship: 

Kusasa: 

Gomora United v Leicesterford City (TUT Stadium, 3pm); Highbury FC v University of Pretoria (Gelvandale Stadium, 3pm)

NgoMgqibelo:

Black Leopards v Casric Stars (Thohoyandou Stadium, 3pm); Cape Town City v Venda FC (Athlone Stadium, 3pm); Milford FC v Lerumo Lions (uMhlathuze Sports Complex, 3pm); Upington City v Kruger United (Mxolisi Dicky Jacobs Stadium, 3pm)

NgeSonto: 

Midlands Wanderers v Hungry Lions (Harry Gwala Stadium, 3pm); The Bees FC v Baroka FC (KaNyamazane Stadium, 3pm)