UHunt usenokungabaza ngoLepasa oqoke ukuyodlala kwiChan
UZAKHELE Lepasa umqeqeshi weDurban City, uGavin Hunt, okubukeka enokungabaza ngaye njengoba eyamaniswa naleli qembu elingomakoti kwiBetway Premiership
Image: BACKPAGEPIX
UMQEQESHI weDurban City, uGavin Hunt, uzwakala enokungabaza ngoZakhele Lepasa oyamaniswa naleli qembu.
ULepasa ungomunye wabadlali abachithwe yi-Orlando Pirates emasontweni adlule. Ngenxa yokuhlushwa wukulimala, ugcine eselizwa ngendaba ijezi kweZimnyama.
UHunt ubekhuluma nabezindaba ngemuva kokuba iCity ibuye nephuzu emdlalweni wayo wesithathu weBetway Premiership ibambana ngo 1-1 neLamontville Golden Arrows kowabakhaya baseThekwini, eChatsworth Stadium, ngoLwesibili.
ICity isiwine imidlalo emibili yePremiership, yadlala ngokulingana komunye. Isendaweni yesithathu kwi-log ngamaphuzu ayisikhombisa.
Ngaphambi kokubhekisa amabombo kwi-African Nations Championship (Chan) e-Uganda neBafana Bafana, uLepasa kuke kwavela ukuthi ufunwa yiCity engomakoti kwiPremiership.
“Empeleni angikaze ngikhulume naye. Usihlalo (uFarook Kadodia) nguyena oke wakhuluma nemenenja yakhe, angazi-ke ukuthi bakhulume bagcinaphi. Kodwa akazange alikhahlele ibhola umqhudelwano wonke (weChan), ngakho angazi," kusho uHunt.
Empeleni uLepasa udlale imidlalo emibili esuka ebhentshini kwemine edlalwe yiBafana kulo mqhudelwano weChan ngaphambi kokukhishwa kwayo yi-Uganda esigabeni samaqoqo ngoMsombuluko, zibambana ngo 3-3.
Ebuzwa ukuthi yena uyathanda yini ukusebenza noLepasa, uHunt uthe: “Angazi kodwa ngicabanga ukuthi uma ungumdlali ofuna inkontileka neqembu lePremiership, kufanele yini uye ekhempini yeChan ?"
Ngenkathi esaqeqesha iSuperSport United, ngesizini ka-2022/2023, uHunt wasebenza noLepasa ebolekiswe yiPirates.
Ngenkathi ekwiSuperSport ubuyelwe yifomu, wabizwa kwiBafana. Wadlala emidlalweni yokuhlungela iNdebe yoMhlaba nakwi-Africa Cup of Nations (Afcon) e-Ivory Coast, nyakenye.
UHunt uveze ukuthi udumele ngokuphuma nephuzu kuphela kowe-Arrows, wathi kodwa akangabazi ukuthi bazokwenza kangcono ngokuqhubeka kwesizini.
“Sizoba ngcono, angingabazi. Sinabadlali abasha abafikayo, abanye abangakadlali, sizoyithola indlela. Sinemidlalo emibili enzima yasekuhambeni esizoyadlala ngakho kufanele sibe yiqembu elingcono njengoba isizini iqhubeka imidlalo iya ngokuqina.”
ICity izobuyela ensimini ngomdlalo wasekuhambeni nePolokwane City, e-Old Peter Mokaba Stadium, ePolokwane, ngoLwesibili ngo-7.30 ebusuku.