Ithemba ngokubuya kwezethenjwa zeBucs koweStellies
ISETHENJWA somgadli we-Orlando Pirates, u-Evidence Makgopa, okubhekeke aphinde abonakale emdlalweni wanamuhla neStellenbosch FC weBetway Premiership e-Orlando Stadium, eSoweto
Image: BACKPAGEPIX
UKUNGAQALI kahle isizini yeBetway Premiership kwe-Orlando Pirates okuphelezelwe wukungenami kwabalandeli ngenxa yokushiywa ngaphandle kwezethenjwa emidlalweni yakamuva, kuqongisa ingcindezi kuleli qembu njengoba lizobhekana neStellenbosch FC namuhla ngo-7.30 ebusuku, e-Orlando Stadium, eSoweto.
IPirates ayikaqoqi nelokubika iphuzu emidlalweni emibili yePremiership esayidlalile. Ikhale ngaphansi kwiSekhukhune United ngo 1-0 nakwiMarumo Gallants ngo 2-1.
Emidlalweni emithathu yakamuva, ngaphambi koweMamelodi Sundowns weMTN8 ngempelasonto edlule, umqeqeshi u-Abdeslam Ouaddou, ugxekwe kakhulu ngabalandeli baleli qembu ngokushiya kwakhe ngaphandle izethenjwa zeqembu okubalwa kuzo uTshegofatso Mabasa, Evidence Makgopa noThalente Mbatha
Nokho kubukeka elibuyisile ithemba kubalandeli baleli qembu, ebophela uMakgopa noMbatha esikimini esiqale umdlalo.
Ngemuva komdlalo weMTN8 eZimnyama ezibambane kuwona ngo 1-1 neSundowns, u-Ouaddou uncome uMakgopa ngendlela adlale ngayo.
“UMakgopa ube nomdlalo omuhle kakhulu. Ngijabule kakhulu ngengikubonile (kuyena), ngokufanayo nakozakwabo. Bakhombise okukhulu ukuzinikela,” ucashunwe kanje u-Ouadddou ngemuva komdlalo neSundowns.
Ukuqaliswa umdlalo kukaMakgopa noMbatha koweSundowns, kubukeka kumshwelezele lo mqeqeshi kubalandeli beZimnyama abesebeqalile ukuwotha ubomvu ngayo. Lokhu kwenza kulindeleke ukuthi nasemdlalweni wanamuhla neStellies baphinde babonakale esikimi esizoqala umdlalo.
Nakuba uMakgopa noMbatha sebebuyele esikimini kodwa akabonwa nangokhalo uMabasa ongomunye wabadlali abalandeli beZimnyama abasafuna incazelo ngokungaboshelwa kwakhe.
Imibiko yokuthi igcine ingaphumelelanga imizamo yeqembu laseMorocco, iMas Fez, yokusayinisa uMabasa izokwenza abalandeli beBucs balindele ukumbona esikimini.
Ngesizini edlule, uMabasa ushayele iBucs amagoli angu-15, waba nesandla kwelilodwa kuyona yonke imiqhudelwano. UMakgopa ushaye angu-10, waba nesandla kwamabili kuyona yonke imiqhudelwano.
Imidlalo yeBetway Premiership:
Namuhla - Ngo-7.30pm:
AmaZulu FC v Marumo Gallants (Princess Magogo Stadium); Magesi FC v Mamelodi Sundowns (Seshego Stadium); Orlando Pirates v Stellenbosch FC (Orlando Stadium)