UZwane usanethemba lamagoli kumgadli woSuthu
UMGADLI waMaZulu FC, uThandolwenkosi Ngwenya, umqeqeshi u-Arthur Zwane okholwa wukuthi usazolisiza ngezindlela ezinigi leli qembu
Image: BACKPAGEPIX
UMQEQESHI waMaZulu FC, u-Arthur Zwane, ubona umgadli uThandolwenkosi Ngwenya esazolisiza iqembu esikhathini esingengakanani, inqobo nje uma engakwazi ukusebenzisa ngendlela amathuba awatholayo phambi kwamapali.
UNgwenya (22) osuka kwiFC Platinu yaseZimbabwe, ngomunye wabagadli abasayiniswe ngaMaZulu ngaphambi kokuqala kwale sizini ngenhloso yokuxazulula inkinga yamagoli. Ubanga ijezi noRyan Moon osuka kwiLamontville Golden Arrows no-Elmo Kambindu ojoyine Usuthu maphakathi nesizini edlule esuka kwiChippa United.
Emdlalweni emibili asayidlalile yeBetway Premiership, uNgwenya ukhombise izimpawu zokuba ngumgadli oyingozi uma eya phambili, nakuba elahle amathuba ambalwa bebhekene ne-Orbit College neMamelodi Sundowns.
USuthu luzodudulana neMarumo Gallants emdlalweni weBetway Premiership kusasa ngo-7.30 ebusuku, ePrincess Magogo Stadium, KwaMashu.
AmaZulu azodlala neGallants nje, abuya esibhaxwini sika 2-0 asithole kwiMamelodi Sundowns, kanti kowokuvula ashaye i-Orbit ngo 1-0 ekhaya.
“UNgwenya usazosisiza ngezindlela eziningi, ungumgadli okwazi ukubhalansisa umdlalo wakhe, okwazi ukubamba ibhola nokungena ezikhaleni ngesikhathi esifanele futhi uhlezi ekhona ebhokisini. Nasemdlalweni wethu ne-Orbit wawathola amathuba cishe amabili amehlula, kanjalo nasemdlalweni weSundowns wawathuba amathuba ambalwa, akwangalunga.
"Ungumgadli olifunayo igoli ngaso sonke isikhathi, wukuthi nje useneshwa lokungalitholi. Kodwa ngikholwa wukuthi uma engasebenzisa ngendlela amathuba awatholayo, izinga lokuzethemba lenyuka kuyena. Ungumgadli osemncane, osazokwenza okukhulu,” kusho uZwane, okuqondayo ukuthi bazobhekana neMarumo esefomini enhle kulezi zinsuku.
“Sizodlala neqembu elinokuzethemba okukhulu njengoba emidlalweni emibili elisayidlalile lingakahlulwa. Ngikholwa wukuthi bazoza kulo mdlalo benethemba lokuthi bazophinda bathole amanye amaphuzu njengoba begcina ukudlala nathi la eThekwini basishaya. Sikulungele ukubhekana nabo, siyakwazi esikulindele kubona. Siyakwazi ukubaluleka kokwenza kahle kulo mdlalo, yize sazi ukuthi akuzukuba ngumdlalo olula. Nokudlalela kwethu ekhaya phambi kwabalandeli bethu kuzofanele kusigqugquzele kusilekelele ekwenzeni kahle kulo mdlalo esiyowudlala.”
IGallants iza kulo mdlalo ithelwe ngezibonkolo njengoba emidlalweni emibili yakamuva yePremiership ishaye iRichards Bay FC ngo 2-1, yalandela ngokushaya i-Orlando Pirates ngamagoli afanayo.