Usuqalile ukushuba umbango wesicoco kwiKZN Sasol League

ASEQALILE ukukhombisa izimpawu zokuba sembangweni wesicoco seligi yeSafa KwaZulu-Natal Sasol League amaqembu amathathu, okuyiLindelani Ladies, Sunflower WFC neNewcastle Chess.

Womathathu la maqembu aqale isizini ngesivuthevuthe, njengoba kuyiwona azihola phambili kuStream A, Stream B no-Stream C ngokwehlukana. 

ILindelani ebuyele kwiSasol emuva kokugawulwa yizembe ngesizini edlule kwiHollywoodbets Super League, izihola phambili ku-Stream C ngamaphuzu angu-12 emidlalweni emine esadlaliwe. Ayikawalahli amaphuzu futhi iwahlohla ngobuningi amagoli emidlalweni yayo.

NgeSonto inenebule iDUT Coastal WFC ngo 5-1 ePrincess Magogo Stadium, KwaMashu. 

Ngesifanayo nakwiChess ayikalahli phuzu emidlalweni emine esadlaliwe kuStream A, njengoba isazihola phambili ngamaphuzu angu-12.

IChess ibuye namaphuzu amqoka ekhaya ishaya iKhananites ngo 2-0, Osizweni Stadium, Osizweni, ngeSonto.

ISunflower esahlulwe kanye emidlalweni emine esayidlalile, isheshe yakwazi ukuziqoqa njengoba kuyiyona manje ezihola phambili kuStream B ngamaphuzu ayisishiyagalolunye, ilandelwa eduze yi-All Stars ngayisishiyagalombili.

Leli qembu laseHammarsdale liphinde labuya namaphuzu amqoka ngeSonto libhaxabula iToti Ladies ngo 3-1 eMpumalanga Stadium, eHammarsdale.

ILindelani ephethwe nguNathi Vilakazi ongusihlalo wayo, ukuqala kwayo isizini ngale ndlela kubukeka kuyinkomba yokuthi izimisele ngokubuyela kumaPlay-Offs kazwelonke okulwela ukukhuphukela kwiSuper League ekupheleni kwesizini. 

Kanti iChess yasoSizweni, eNewcastle, edlale amaPlay-Offs esifundazwe iminyaka ilandelana, nangesizini edlule iphunyukwe yithuba lokuyodlala kwekazwelonke ihlulwa yi-Ezemvelo Women’s FC kowamanqamu esifundazwe. 

Imiphumela yeKZN Sasol League: 

Stream A: 

Dlala Ntombazane 0-3 Mshwathi Future Stars; DUT Midlands 2-0 PSG Amabhaca Ladies; Newcastle Chess 3-0 Khananites

Stream B: 

Unizulu Ladies 1-0 UKZN FC; Roman United 0-1 All Stars; Sunflower WFC 3-1 Toti Ladies

Stream C: 

Westville United 1-3 Sapphire Ladies; Darnall 1-0 Diski Pros Academy; Lindelani Ladies 5-1 DUT Coastal WFC