Onqobe koweLembe Mtelebhelo uthembisa ‘ngokubasaphaza’ nakweminye imijaho
USNOTHANDO Thabethe ongumgibeli wehhashi, uShayizandla, elidle umhlanganiso kubagibeli besifazane emjahweni iLembe Mtelebhelo Festival eKhenana, eNdwedwe, ngempelasonto
Image: MOTSHWARI MOFOKENG
UZAKHELE Mkhabela umgibeli wehhashi u-Abantu Abakholwa, elidle umhlanganiso emjahweni iLembe Mtelebhelo Festival, eNdwedwe, ngempelasonto
Image: MOTSHWARI MOFOKENG
UMGIBELI wamahhashi omtelebhelo osezakhele igama KwaZulu-Natal, uZakhele Mkhabela, uthembise ukuthi usazoqhubeka nokukhonya nakweminye imijaho esazodlalwa kulesi sifundazwe kulo nyaka.
Abantu Abakholwa, okuyihhashi lasesifundeni iTheku okuyilona elidle umhlanganiso lahlomula ngo-R4 500, emjahweni iLembe Mtelebhelo Festival obugijinywa eKhenana, eNdwedwe, ngempelasonto, beligitshelwe uMkhabela.
UMkhabela (24) waseMgundeni, e-Utrecht, nguyena ongumgibeli wehhashi laseMajuba, uMpendulo, okuyilona elidle umhlanganiso kwiDundee July Traditional Rural Horse Racing neKing Cetshwayo Traditional Rural Horse Racing, ngoJulayi eDundee naseMpangeni, ngokwehlukana.
Kubagibeli besifazane umhlanganiso udliwe uShayizandla, ihashi lasesifundeni uMgungundlovu, ebeligetshelwe uSnothando Thabethe, lahlomula ngo-R4 500.
Lo mjaho ohlelwe yiLembe Mtelebhelo Horse Association, bekungokokuqala usingathwa esifundeni iLembe esisika iphethini kwezinye izifunda ezisingatha imijaho yamahhashi omtelebhelo esifundazweni, okubalwa uMzinyathi osingatha iDundee July, iKing Cetshwayo esingatha iNkandla May neKing Cetshwayo July, neHarry Gwala esingatha iHarry Gwala Summer Cup, egijinywa ngoNovemba.
“Kuyangijabulisa ukuthi ngibe ngowokuqala ukunqoba lo mjaho weLembe Mtelebhelo obuqala ukugijinywa kule ndawo yaseNdwedwe, kulokhu ngigibele ihhashi laseThekwini.
Kungumsebenzi wami ukugibela amahhashi nokuwanakekela, njengoba ngenza wona lo msebenzi eMgungundlovu lapho ngisebenza khona.
Ngisazoqhubeka nokukhonya emijahweni eyahlukene, njengoba naseMzimkhulu ngiyokwenza okufanayo ngamahhashi angakithi e-Utrecht ngoSepthemba 6, ngoSepthemba 14 ngiyobasaphaza eKokstad, ngidlulele eNtabankulu, e-Eastern Cape, nakhona futhi ngiyobasaphaza,” kusho uMkhabela ngokuzethemba.
USnothando (16) waKwaDindi, eMgungundlovu, uthi uthando lokugibela amahhashi lwaqala kuyena esemncane kakhulu ekhuthazwa nguyise, uMthokozisi Thabethe, okunguyena umnikazi wehhashi uShayizandla.
“Ubaba nguyena owangenza ngaba nothando lokugibela amahhashi ngoba wayewagibela. Ngaqala ukugibela amahhashi ngineminyaka eyisithupha, sengidlale emijahweni eminingi impela engibala kuyo oDundee July, Harry Gwala Summer Cup, neminye eminingi.
Ngizimisele ngokukhula kulo mdlalo wokugibela amahhashi ngigcine sengumgibeli wamahhashi osezingeni eliphezulu ezweni,” kusho uSnothando, owenza uGrade 11 eMlungisi Secondary School, KwaDindi.
UNompumelelo Van Nieuwehuizen, oyiphini lomqondisi eMnyangweni wezeMidlalo, ubuCiko namaSiko esifundeni iLembe, uthe isifiso sabo ukubona lo mjaho udlondlobala.
“Nathi siyisifunda iLembe sibone kufanele ukuthi singene kulo mdlalo wamahhashi omtelebhelo, yize sisacathula singakafiki ezingeni lemijaho yakwezinye izifunda esithuthukile.
Kodwa siyafisa ukuthi eminyakeni emibili emithathu ezayo lo mjaho wethu ukhule nawo uthuthukise nomnotho wakulesi sifunda ngezindlela ezahlukene, sithole nabaxhasi abathe xaxa.
Esikhathini esizayo sifuna ukubona nabasiki bengqephu bebamba iqhaza bekhangisa ngomsebenzi wabo kulo mjaho njengoba kwenzeka nakweminye imijaho yalolu hlobo esithuthukile, intsha yethu esemkhakheni yezengqephu ihlomule,” kusho uvan Nieuwehuizen, oncome kakhulu uLunga Sokhela owake waba yimenenja yaMaZulu FC, nongomunye wabahleli balo mjaho, ngeqhaza alibambile ekubatholeleni abaxhasi.
Lo mjaho uxhaswe uMasipala wesifunda iLembe, iNdwedwe, Hollywoodbets Foundation, Aquelle, noMnyango wesifundazwe wezokuThuthukiswa koMnotho, ezokuVakasha nezeMvelo.