Kuzosiphuka izidindi koweLembe Mtelebhelo Festival eNdwedwe

ZIZODLANA imilala okokuqala emjahweni wamahhashi omtelebhelo esifundeni iLembe, iLembe Mtelebhelo Festival, ozobanjelwa eKhenana, eNdwedwe, ngoMgqibelo. 

Lo mjaho okuzobe kungokokuqala ugijinywa kulesi sifunda esihlanganisa omasipala abane  iNdwedwe, KwaMaphumulo, KwaDukuza neMandeni, usika iphethini kweminye imijaho yasesifundazweni iKwaZulu-Natal esinedumela, okubalwa kuyona iDundee July Traditional Rural Horse Racing, King Cetshwayo, Nkandla May, neHarry Gwala Summer Cup, edonsa izinkumbi zabathandi bemjaho yamahhashi omtelebhelo.

Lo mjaho ohlelwe yiLembe Mtelebhelo Horse Association okuzogadulisana kuwo amahhashi angu-39 aliqhamukisa esifundeni iLembe, uMgungundlovu neTheku, uzoqala ngo-9 ekuseni usongwe ngo-5 ntambama.

Uxhaswe uMasipala wesifunda iLembe, iNdwendwe, Hollywoodbets Foundation, noMnyango wesifundazwe wezokuThuthukiswa koMnotho, ezokuVakasha nezeMvelo.

Mihlanu imijaho ezizobe zidlana kuwo imilala izinjomane, okubalwa nomjaho wabesifazane, wona oxhaswe nguMnyango wezokuThuthukiswa koMnotho, ezokuVakasha nezeMvelo njengengxenye yokuqhakambisa inyanga ka-Agasti yabesifazane, ngenhloso yokuthuthukisa abagibeli bamahhashi besifazane ukuthi bakhule kulo mdlalo. 

Ngokusho kukanobhala weLembe Mtelebhelo Horse Association, uThandeka Mandeni, angu-15 amahhashi asesifundeni iLembe azomela lesi funda njengosokhaya bomjaho, kube angu-24 amenyiwe ezifundeni iTheku, noMgungundlovu. 

“Ngemuva kokucobelela ulwazi ngokuhambela eminye imijaho yesifundazwe okubalwa kuyo iDundee July, Nkandla May, Harry Gwala neminye, sibe sesithatha isinqumo sokuthi sihlele owethu umjaho esifundeni sakithi iLembe, esizokwazi ukuthi sikhulise ngawo umdlalo wamahhashi omtelebhelo esifundeni. 

Yize kungokokuqala kulo nyaka sisingatha umjaho walolu hlobo, kodwa isifiso sethu esokuthi nawo ukhule ufinyelele ezingeni leminye imijaho esithuthukile esifundazweni,” kusho uMandeni. 

“Ngaphandle kokuzijabulisa ngokubuka amahhashi abantu abazobe behambele lo mcimbi, bazothokoziswa ngabaculi bendawo abazobe benandisa. 

Kuzoba nanombukiso wemvunulo yesintu, okubalwa kuyo ubuhlalu namabheshu nokunye, kanti futhi nosomabhizinisi abancane bendawo bazobe bevulelekile ukuhweba ngokugunyazwa yihhovisi lendawo loMnyango wezokuThuthukiswa koMnotho. Ngakho siyabamema abantu basesifundei iLembe ukuthi beze ngobuningi ukuzokweseka lo mjaho.”

ILembe Mtelebhelo Festival ilandela imijaho esidlaliwe esifundazweni kulo nyaka, okuyiNkandla May ebingoMeyi, eNkandla, iDundee July ebiseDundee ngoJulayi, neKing Cetshwayo ebiseMpangeni ngawo uJulayi.

Kanti kusabhekwe eminye imijaho okubalwa kuyo iHarry Gwala Summer Cup ezobanjelwa e-Underberg, ngoNovemba.