UCardoso ufuna ixazululwe ngokushesha eyabadlali beDowns
UMQEQESHI weMamelodi Sundowns, uMiguel Cardoso, ofisa izinkinga ezithinta abadlali okubalwa kubo uKhuliso Mudau (osesithombeni) noLucas Ribeiro zixazululeke ngokushesha
Image: BACKPAGEPIX
AKAFUNI izinkinga ezithinta abadlali ziphazamise iqembu enkundleni umqeqeshi weMamelodi Sundowns, uMiguel Cardoso, ofuna zixazululwe ngokushesha ukuze ligxile ngokuphelele enkundleni.
UCardoso obekhuluma nezintatheli ngemuva kokuba ezakhe zinqobe umdlalo wokuqala kule sizini yeBetway Premiership ngokushaya AmaZulu FC ngo 2-0 ngoLwesibili, eLoftus Versfeld Stadium, ePitoli, uvumile ukuthi zikhona izinkinga zangaphandle kwenkundla ezithinta abadlali.
ISundowns beyize emdlalweni wangoLwesibili naMaZulu ibuya ekudlaleni ngokulingana ngo 1-1 neChippa United kowokuvula wePremiership ngempelasonto.
Nokho indaba esashisa ibunzi namanje kubalandeli baleli qembu elingompetha bePremiership, ngeyabadlali abangabonwa esikimini seSundowns okunguLucas Riveiro noKhuliso Mudau.
Kunamahlebezi okuthi uMudau akaneme ngenxa yemali ayiholayo afuna inyuswe noThapelo Maseko osanda kubhala ezinkundleni zokuxhumana ukuthi usephelelwa nawuthando lwebhola kwazise akadlaliswa kwiSundowns. URibeiro kuthiwa kunamaqembu aphesheya kwezilwandle amfunayo.
UPeter Shalulile okusanda kuvela ukuthi akasaneme, muva nje ubuyile njengoba ebonakele emidlalweni emibili yakamuva okungoweChippa United esebhentshini, nakowaMaZulu lapho engene khona esuka ebhentshini
“Abaphathi beqembu balusingatha ngendlela efanele lolu daba lwabadlali kodwa ngifuna luxazululwe ngokushesha ukuze njengeqembu sikwazi ukugxila ngokuphelele kule midlalo ethothene. Khona bekungaba ngcono ukuba lolu daba balusingathe ngaphambi kokuqala kwesizini, kodwa-ke izinto zenzekile.
Iqembu alidayisi (abadlali) njengamanje ngoba siyazi ukuthi sifuna ukuyaphi. Kudingeka ngiqhubeke ngabadlali enginabo, abazolwela ijezi nesithunzi seqembu,” kusho uCardoso.
“Eqenjini elinjengeSundonws elinabadlali abathola ithuba lokudlala ezingeni lomhlaba njengeFifa Club World Cup, kujwayelekile lokhu. Kodwa ngeke sivumele lesi simo siphazamise iqembu ngoba sinemidlalo emqoka okusafanele siyidlale njengoba isizini isiqalile nje.”
Ebuzwa kabanzi ngoRibeiro noMudau, lo mqeqeshi uvumile isimo salaba badlali akulula ukusisangatha.
“Akulula ukusingatha lesi simo futhi singeze sakwazi ukuthalalisa sishaye sengathi asikhathazekile noma sikholwe wukuthi ngeke sibe nawo umthelela eqenjini.
Abadlali bayahlangana baxoxe ngezinkinga zabo ngakho ngeke sikugweme lokho. Kodwa okumqoka wukuthi siqinisekise ukuthi abadlali beqembu basesimweni esifanele somqondo ukubhekana nomsebenzi ophambi kwabo, silwele ukunqoba imidlalo okusazofanele siyidlale,” kuqhuba uCardoso.
AmaSandawana azibekisele indawo kowandulela owamanqamu eMTN8 ngokunenebula iRichards Bay FC ngo 4-0 kuma-quarterfinal, azobhekana ne-Orlando Pirates kowomlenze wokuqala owandulela owamanqamu ngoMgqibelo ngo-3 ntambama, e-Orlando Stadium, eSoweto.