Unozinti weChiefs ufisa bagweme amathonsi abanzi

UNOZINTI weKaizer Chiefs, uBrandon Petersen, uqhakambisa ukubaluleka kokuqoqa amaphuzu ngokushesha zibekwa ukuze bagweme isimo esibehlele ngesizini edlule. 

IChiefs ehlulekile ukuzibekisela indawo kwiTop 8 ngesizini edlule, ivule isizini yeBetway Premiership ngonyawo oluthembisayo iguqisa iStellenbosch FC ngo 2-0 ngeSonto, eKapa.

Ukunqoba kwayo kowokuvula kufuze kube yisikhuthazi kuleli qembu laseSoweto elizodudulana nePolokwane City emdlalweni walo wasekhaya wePremiership eFNB Stadium, eNasrec, namuhla ngo-7.30 ebusuku. 

“Kubaluleke kakhulu ukuqoqa amaphuzu isizini isaqala, ikakhulukazi uma ubheka indlela imidlalo ethothene ngayo, nanokuthi sisazodlala nemidlalo yeCaf (Confederation Cup). 

"Kuzofanele sakhele phezu komphumela omuhle wokunqoba umdlalo wethu wokuqala ngempelasonto ngoba ngesizini edlule sihlulekile ukukwenza lokho, sazithola sesibamba siyeka isizini isiyophela, sishaya izibalo.

"Ngakho kuzofanele sikubeke eqhulwini kule sizini ukulwela amaphuzu emdlalweni ngamunye esiwudlalayo,” kusho uPetersen okugcizelele ukubaluleka kokuqina kodonga lwabo lwasemuva kule sizini.

Ngesizini edlule, Amakhosi angenelwe ngamagoli angu-32 emidlalweni engu-28 yePremiership, okuyinkomba yokuvuza kodonga lwayo lwasemuva. 

Emizamweni yokulungisa lokho kule sizini, leli qembu lisayinise abadlali basemuva abathathu okunguThabiso Monyane, uPaseko Mako noNkanyiso Shinga.

“Bahlale bethi udonga lwasemuva yilona olukunqobela isicoco seligi. Kusukela siqalile ukulungiselela le sizini, sibona kunomehluko endleleni esivala ngayo emuva. Kungebona abadlali basemua kuphela kodwa neqembu nje lilonke. Mkhulu umsebenzi esiwenzayo uma singaliphethe ibhola, ukuqinisekisa ukuthi asingenelwa ngamagoli angenasidingo. Nabadlali ababe namaphutha odongeni lwethu lwasemuva ngesizini edlule, basebenza kanzima ukuqinisekisa ukuthi kule sizini asizitholi senza amaphutha afanayo,” kuqhuba uPetersen.

IChiefs izophinda idlale ngaphandle komqeqeshi, uNasreddine Nabi, ophuthume ekhaya eTunisia, kulandela ukulimala kukankosikazi wakhe ngesonto eledlule. Ebhentshini kuzoqhubeka amaphini akhe, uKhalil Ben Youssef noCedric Kaze.

Imidlalo yeBetway Premiership:

Namuhla:

Durban City v Chippa United (Chatsworth Stadium, 7.30pm); Golden Arrows v Richards Bay FC (King Zwelithini Stadium, 7.30pm); Kaizer Chiefs v Polokwane City (FNB Stadium, 7.30pm); Magesi FC v Stellenbosch FC (Seshego Stadium, 7.30pm); Sekhukhune United v TS Galaxy (Peter Mokaba Stadium, 7.30pm)