U-Ouaddou usikaza izinguquko esikimini sePirates koweMarumo

UKUTHOTHANA kwemidlalo kule zini esanda kuqala, akumtatazelisi umqeqeshi we-Orlando Pirates, u-Abdeslam Ouaddou, kwazise ukuthatha njengethuba elikahle lokudlalisa abadlali abahlukene njengoba luselude ukhalo olusazohanjwa. 

IPirates eguqiswe yiSekhukhune United ngo 1-0 kowokuvula weBetway Premiership ngoMgqibelo, ibuyela ensimini ngomunye umdlalo wePremiership neMarumo Gallants namuhla ngo-7.30 ebusuku, eDr Molemela Stadium, eBloemfontein. 

Ngemuva kwalo mdlalo wanamuhla, iBucs izodudulana neMamelodi Sundowns kowomlenze wokuqala weMTN8 ngoMgqibelo ngo-3 ntamama, e-Orlando Stadium, eSoweto. 

Emidlalweni emibili yakamuva esadlalwe yileli qembu laseSoweto ngaphansi kuka-Ouaddou, okungoweMTN8 ehlule kuwona iPolokwane City noweligi neSekhukhune, kunezinguquko esikimini ebesidlala ngesizini edlule ngaphansi kukaJose Riveiro.

Kubonakale abadlali abasha okubalwa kubona uSihle Nduli, Sipho Mbule, Oswin Appollis, Yanela Mbuthuma, Tshepang Moremi, Tshepo Mashiloane, Abdoulaye Mariko noKamogelo Sebelebele.

Abakabonakali abadlali abebeyizethenjwa ngesizini edlule okubalwa kubona uMakhehleni Makhaula, Thalente Mbatha, Tshegofatso Mabasa no-Evidence Makgopa. Lokhu akwehli kahle kubalandeli beZimnyama.

“Siyazi ukuthi kule sizini sizoba nemidlalo eminingi ethothene, lokhu ukusho ukuthi sizobadinga abadlali bethu ngokwehlukana kwabo ngezindawo abazidlalayo. Sinabadlali abaningi, engicabanga ukuthi ukubanika ithuba ngokwehlukana kungaba kuhle kakhulu njengoba sinemidlalo eminingi kangaka nje esisazoyidlala. Sinabadlali abaningi kule sizini, wonke umdlali uzolithola ithuba lokudlala,” kusho u-Ouaddou.

UMashiloane ongumdlali wasemuva kwesokudla ojoyine eZimnyama ngaphambi kokuqala kwesizini esuka kwiBaroka FC, nguyena oqale umdlalo esikhundleni sikaBandile Shandu odlale kule ndawo beguqisa iPolokwane City kowama-quarterfinal eMTN8. 

“UMashiloane udlale kahle, kufanele simncome ngendlela adlale ngayo, siqhubeke nokukholelwa kuyena.”

Kulo mdlalo wanamuhla ebusuku neMarumo, akubuzwa ukuthi amehlo abalandeli baleli qembu azophinde athi njo esikimini esizoboshelwa u-Ouaddou njengoba abanye sebeqala ukushaya amakhala ngokushiya ngaphandle kwakhe abadlali abebeyizethenjwa zeqembu ngesizini edlule. 

Imidlalo yeBetway Premiership: 

Namuhla: 

Mamelodi Sundowns v AmaZulu FC (Loftus Versfeld Stadium, 7.30pm); Marumo Gallants v Orlando Pirates (Dr Molemela Stadium, 7.30pm); Orbit College v Siwelele (Dobsonville Stadium, 7.30pm)

Kusasa:

Durban City v Chippa United (Chatsworth Stadium, 7.30pm); Golden Arrows v Richards Bay FC (King Zwelithini Stadium, 7.30pm); Kaizer Chiefs v Polokwane City (FNB Stadium, 7.30pm); Magesi FC v Stellenbosch FC (Seshego Stadium, 7.30pm); Sekhukhune United v TS Galaxy (Peter Mokaba Stadium, 7.30pm)