Bafunde lukhulu engqungqutheleni abesifazane abakwezemidlalo
UNOZINTI weBanyana Banyana, u-Andile Dlamini, ngomunye wababambe iqhaza kwiMomentum Women Who Make Moves In Sports Summit.
Image: SITHUNYELWE
BAKHOLWA wukuthi bancele ulwazi oluzobasiza bathuthuke enkundleni nangaphandle kwayo abesifazane ababambe iqhaza kwezemidlalo abebeyingxenye yengqungquthela ebihlelwe yinkampani, iMomentum, ngempelasonto ebiqondene nokugubha iWomen’s Day.
Lo mbuthano owaziwa nge-Women Who Makes Moves in Sports Summit, ububanjelwe eGordon Institute of Business Science (GIBS) eGoli, kusukela ngoLwesihlanu kuya ngoMgqibelo.
Ngaphandle kwabadlali, abaqeqeshi, izintatheli zezemidlalo, ababambe iqhaza ekuphathweni kwemidlalo yabesifazane nabanye, bekukhona nezikhulumi eziningi ebezithinta izihloko ezahlukene okubalwa kuzona ukunakekela ingqondo, ukuphatha imali, izindlela zokuzimaketha, ukuthola abaxhasi, izinkontileka nokunye okuningi.
“Kulo nyaka sigxile esiqubulweni esithi “I have The Algorithm”, ukukhumbuza abesifazane ababambe iqhaza kwezemidlalo ukuthi banolwazi namakhono okuthuthukisa izimo zabo kunoma yiliphi izinga abakulona,” kusho uNontokozo Madonsela, oyiChief Marketing Officer kwaMomentum.
“Simeme ongoti abahlukene ukuze abesifazane abakwezemidlalo baqonde ukuthi njengoba bekwazi ukusebenzisana nongoti ukuze bathuthukise indlela abadlala ngayo bangenza okufanayo ukuze bathuthuke ezindleleni zokwenza nokuphatha imali.”
Phakathi kwezihlabani zemidlalo ebezikhona, kubalwa unozinti u-Andile Dlamini, obeseqenjini leBanyana Banyana eliqede endaweni yesine kwiWomen’s Africa Cup of Nations (Wafcon) eMorocco.
“Kuhlale kumnandi ukuhlangana nabanye abantu abasohambweni olufana nolwakho ukuze sicobelelane ngolwazi olubalulekile nezisombululo zezinkinga ezahlukene esibhekana nazo mihla namalanga njengabesifazane ababambe iqhaza kwezemidlalo,” kusho uDlamini.
"Ukuba segunjini elilodwa nalaba besifazane abamangalisayo nokuzwa izindaba zabo kwenza umehluko omkhulu. Anginawo amazwi anele okuchaza ukubaluleka kolwazi esiluthole ezikhulumini ezingongoti emikhakheni ehlukene nokuthi kuzosisiza kanjani njengoba siqhubeka nokudlala futhi silungiselela impilo esizoyiphila uma sesiqedile ukudlala.”
UMDLALI wamaBhokobhoko esifazane, uRights Mkhari
Image: SITHUNYELWE
Umdlali weqembu lesizwe lombhoxo labesifazane, uRights Mkhari, naye ukholwa ukuthi le ngqungquthela izoba nomthelela omkhulu kuyena nabo bonke abebeyingxenye yayo.
“Lezi zinsuku ezimbili bezimangalisa, sifunde ngakho konke okufanele sikwazi ukuze siziqinise futhi siqinisekise ukuthi senza kahle kwezemidlalo nasempilweni,” kusho uMkhari.
“Ngijabule ukuthi ngesikhathi kuthintwa izinto eziningi esibhekene nazo kubalwe kuzona ukunakwa kwemidlalo yabesifazane, izindaba zamaholo, ukuxhaswa nezinye izindlela zokwenza imali.
“Izinto ziya ngokuya ziba ngcono kodwa kube kuhle ukukhunjuzwa ukuthi kumele sibambe iqhaza ukuze amantombazane asemancane eza ngemva kwethu afike izinto sezingcono kakhulu.”
Yize iWomen Who Make Moves in Sports ibibanjwa okwesithathu, ukuzibophezela kweMomentum ekufukuleni abesifazane emikhakheni eyahlukene, sekuqhubeke iminyaka eyisithupha ngaphansi kwesiqubulo esithi ‘She Owns Her Success’.
Njengoba sekuwunyaka wesikhombisa, ziningi ezinye izinhlelo okubalwa kuzona ingqungquthela ezobanjwa ngobuchwepheshe besimanje ngo-Agasti 16, kanjalo neBoost Her Boots Fund lapho iMomentum izotshala khona u-R500 000 ukusiza abafuna ukuqala noma ukuthuthukisa amabhizinisi abo.