ILindelani neChess baqale ngesivuthevuthe kweyeSasol

ILINDELANI Ladies neNewcastle Chess bayiqale ngenothi eliphezulu isizini ka-2025 yeSafa KwaZulu-Natal Sasol League ngokubuya namaphuzu aphelele ngokwehlukana emidlalweni yokuvula.

ILindelani inenebule iDiski Pros Academy ngo 6-0 ePrincess Magogo Stadium, KwaMashu, ngeSonto, kwathi iChess yavula isizini ngokushaya iPSG Amabhaca Ladies ngo 2-0 Osizweni Stadium, eNewcastle. 

ILindelani eqeqeshwa nguNathi Vilakazi, yisizini yayo yokuqala le ibuyele esigabeni seSasol League kulandela ukugawulwa kwayo yizembe kwiHollywoodbets Super League ngesizini edlule. 

Ngesizini ka-2023 womabili la maqembu, iLindelani neChess, yiwona ayebanga isicoco seligi kwagcina kuphumelela iLindelani kumaPlay-Offs esifundazwe, yamela iKwaZulu-Natal kwekazwelonke okuyilapho yaphumelela khona ukukhuphukela kwiSuper League. Ihlale kulesi sigaba isizini, yagawulwa yizembe yabuyela kwiSasol. 

Nangesizini edlule iChess eqeqeshwa wuThokozani Masondo, yiyona futhi ebibanga isicoco ne-Ezemvelo Women’s FC yagcina ikhale ngaphansi. Kuphumelele i-Ezemvelo kumaPlay-Offs esifundazwe, yadlulela kwekazwelonke nakhona yadla umhlanganiso yakhushulelwa kweseSuper League. Kuyiwe ekhefini le-Women’s Africa Cup of Nation (Wafcon) isahlezi endaweni yesishiyagalombili kwi-log.

Ngakolunye uhlangothi, iSunflower WFC eqeqeshwa wuSiyabonga Malinga engelinye lamaqembu ahlonishwayo kulesi sigaba seSasol, ivule ngebatha isizini ishaywa yi-All Stars ngo 2-0 eMpumalanga Stadium, eHammarsdale, ngeSonto.

Ngenhloso yokugwema izindleko zokuhambela imidlalo yasekudeni, iSafa KZN ithathe isinqumo sokwehlukanisa amaqembu adlala kule ligi ngokwama-Streams amathathu, okunguStream A, B no-C.

Lesi sinqumo sithathwe emva kokuba iSasol, ebingabaxhasi bale ligi, inqume ukungayivuseleli inkontileka nakuba zisekhona izingxoxo zokubuyekezwa kwesinqumo.

Womathathu la maqembu azoba nemidlalo emqoka kule mpelasonto, njengoba iLindelani ezolwela ukuqhubeka nomgqigqo evule ngawo isizini kuStream C izotholana phezulu neSapphire Ladies, eWentworth Ogle Ground, ngeSonto ngo-1 ntambama.

IChess izotholana phezulu neMshwathi eGeorgonau Stadium, eWartburg, ngeSonto ngo-1 ntambama kuStream A. ISunflower izobhekana ne-UKZN FC, eHoward Gate 10, eThekwini, ngesikhathi esifanayo.

Isiyonke imidlalo yeSafa KZN Sasol League imi kanje:

KuStream A: 

Namuhla: 

DUT Midlands v Dlala Ntombazane (Endumiso Field, 5pm)

NgeSonto:

Mshwathi Future Stars v Newcastle Chess (Georgenau Stadium, 1pm); DUT Midlands v Khananites (Endumiso Field, 1pm); Dlala Ntombazane FC v PSG Amabhaca Ladies (FNB Wadley, 1pm); DUT Midlands v Khananites (Endumiso, 1pm)

Stream B:

NgoMgqibelo:

Romans United v UniZulu Ladies (Umhlathuze SC, 11am)

NgeSonto: 

UKZN v Sunflower WFC (Howard Gate 10, 1pm); UniZulu Ladies v All Stars (Ongoye Stadium, 1pm); Romans United v Toti Ladies (Umhlathuze SC, 1pm)

Stream C:

NgeSonto:

Sapphire Ladies v Lindelani (Wentworth Ogle, 1pm); Westville United v Diski Pros Academy (Westville Field, 1pm); Darnall FC v DUR Coastal WFC (Twinnie Park, 1pm)