Ubalisa ngekusasa unozinti 'ozitshwa' yiDurban City
UNOZINTI uDumisani Msibi ongakazi ngekusasa lakhe kwiDurban City phezu kokuhlabana ngomkomelo weMotsepe Foundation Championship Goalkeeper of the Season
Image: BACKPAGEPIX
USEBUMNYAMENI ngekusasa lakhe kwiDurban City unozinti, uDumisani Msibi, obengukaputeni waleli qembu ngesizini edlule liwina iligi yeMotsepe Foundation Championship.
UMsibi (30) ukhale wamuka nomklomelo weMotsepe Foundation Championship Goalkeeper of The Season emcimbini wokuklomelisa abenze kahle kwiPremier Soccer League (PSL) obungoLwesibili eGauteng. Bekungokokuqala nonyaka iPSL ikhipha imiklomelo yabadlali bamaqembu eChampionship.
Nokho, lo mdlali uveze ukukhathazeka kwakhe ngokungacaci kwekusasa lakhe kwiCity njengoba engakaze aziqeqeshe nalo. Leli qembu kade lidlala emqhudelwaneni iKZN Premier's Cup njengoba lizicijela ukuqala kwesizini yeBetway Premiership ka-2025/2026 ngaphansi komqeqeshi, uGavin Hunt.
“Into engikhathazayo wukuthi angikazi namanje ngekusasa lami eqenjini. Ngingomunye wabadlali abangakabizwa ukuzoziqeqesha neqembu emalungiselelweni angesizini ezayo. Akekho ezikhulwini ophumela obala ngokungicacisela ukuthi kumiphi ngekusasa lami eqenjini, futhi abanginkii nencwadi engikhululayo ngoba sekuyangicacela vele ukuthi angiseyona ingxenye yeqembu. Ngokwami into engiyidingayo manje yincwadi engikhululayo ukuthi ngiyozama engxenye ngoba ibhola yilona eliyisinkwa sami, nginomndeni othembele kimi,” kusho uMsibi.
“Anginanxa neqembu futhi ngikujabulele ukuba yingxenye yalo nokuba phakathi kwabadlali ababambe iqhaza empumelelweni yalo ngesizini edlule liwina iligi yeMotsepe Championship, likhushulelwa kwiBetway Premiership. Ngiyazi ukuthi izinto ezinjengalezi ziyenzeka ebholeni futhi ngeke ngisole muntu uma ngingasekho ezinhlelweni zeqembu zangesizini ezayo.”
Njengoba uMsibi elindele ukubizwa ejimini iCity isayinise onozinti ababili okunguDarren Keet obedlalela iCape Town City noFredrick Asare waseGhana ekubeni kuvele kukhona u-Ayanda Mtshali abebanga naye ijezi ngesizini edlule.
Umklomelo awuwinile weMotsepe Foundation Goalkeeper of The Season ubungowokuqala okhishwe yiPSL kwazise eminyakeni edlule bekugcina ngowe-Top Goal Scorer.
“Ukuthola lo mklomelo kusho lukhulu kimina, ikakhulukazi njengoba bekungokokuqala kule sizini iPSL yethula imiklomelo yabadlali abadlala kwiMotsepe Championship. Ukuqokwa nje kukodwa kuyinto enkulu, ngakho ukuwina sekuyibhonasi. Yize imidlalo eminingi yeMotsepe Championship ingavezwa kwi-TV kodwa kuyajabulisa ukuthi bakhona abebekunaka esikwenzayo, bakwazi nokubona abadlali okufanele baqokelwe imiklomelo ethize. Ngakho ukuzuza kwami lo mklomelo weGoalkeeper of The Season kungenza ngizizwe ngithobekile, nginokuziqhenya ngokuthi amagalelo ami abonakele ngesizini edlule kwiDurban City,” kuqhuba uMsibi.
Imizamo yokuthola ukuphawula kukasihlalo weCity, uFarook Kadodia, ayiphumelelanga izolo kwaze kwashaya isikhathi sokushicilela udaba engatholakali ocingweni.