OweZemvelo ushenxise umqeqeshi 'ongakwazi ukusebenza nabadlali besifazane'

USIHLALO weZemvelo Women’s FC, uSiphindile Sithole, uthi yize iqembu belisenza kahle kwiHollywoodbets Super League kule sizini yalo yokuqala kodwa ubone kufanele ashintshe umqeqeshi athole ozokwazi ukumelana nokusebenza nabadlali bebhola besifazane.

Ezemvelo okuyisizini yayo yokuqala kwiSuper League, iqale isizini ngoRichard Zuma obengene esikhundleni sikaNkosingiphile Maphumulo ohole leli qembu ngesizini edlule, lidla umhlanganiso kumaPlay-Offs kazwelonke eSasol League likhushulelwa kwiSuper League. 

Ngokusho kukaSithole, yize uZuma ubesayibambe ngohlelo kodwa ukungabi nawo amava okusebenza nabadlali besifazane yikho okwenze bamshenxise, kwaqashwa uNtokozo Bhengu nephini lakhe u-Andile Mthembu.

“URich ungumqeqeshi omuhle osezingeni eliphezulu ekuqeqesheni kodwa ukungabi naso isipiliyoni sokuqeqesha abadlali besifazane yikhona okwenze kwangaba lula ukusebenza kwakhe nabadlali beqembu njengoba ubevele eqala ukuqeqesha iqembu labesifazane. Sibe sesimkhulula sabona kufanele sithole umqeqeshi okwaziyo ukusebenza nabadlali besifazane. 

UNtokozo Bhengu nguyena esibone kufanele athathe umsebenzi wokuqeqesha leli qembu nephini lakhe, u-Andile Mthembu. UBhengu uke waqeqesha kwiDurban Ladies eminyakeni edlule eyiphini lomqeqeshi. Emidlalweni emine beqalile iqembu lisenza kahle, likwazile ukubuya namaphuzu, ngakho siyalethemba futhi siyaleseka ithimba lethu labaqeqeshi,” kusho uSithole.

USithole uvumile ukuthi abadlali kubathathe isikhashana ukuzinza ekudlaleni kulesi sigaba seSuper League. Ngempelasonto edlule, babuye nephuzu bebambana ngo 1-1 ne-University of Pretoria ekuhambeni. 

“Lesi sigaba sinezinselelo eziningi uma usiqhathanisa neseSasol League ezinhlangothini ezahlukene okubalwa ukuhamba amabanga amade uma siyodlala ekuhambeni kwezinye izifundazwe okuyinto ebesingayijwayele ngoba besihamba amabanga angamade kakhulu ngaphakathi esifundazweni sethu. Nokho, sesiqalile ukuzinza kulesi sigaba. Ngomzuliswano wokuqala abadlali bethu bebenokwethuka, ikakhulukazi uma sidlala namaqembu asatshaywo kulesi sigaba anjengoSundowns (Mamelodi Sundowns Ladies) noJVW FC. Kodwa manje sebekhombisa ukuvuthwa. Ukuqala kwethu ngemidlalo enzima ngikholwa wukuthi kubaqinisile abadlali bethu. Indlela iqembu elidlala ngayo manje kusukela kuqale umzuliswano wesibili, kusinika ithemba lokuthi singagcina sikwazile ukufeza umgomo wethu wokuqeda kuTop 5,” kuqhuba uSithole.

Ezemvelo isendaweni yesishiyagalombili kwi-log yeSuper League. Kusasa izotholana phezulu neDurban Ladies eKing Zwelithini Stadium eMlaza, ngo-3 ntambama emdlalweni wabakhaya obhekwe kakhulu.

Imidlalo yeHollywoodbets Super League

Kusasa:

Royal AM v Richmond United (Harry Gwala Stadium, 1pm); UCT v Copper Belts (Kopano Astro, 3pm); Ezemvelo Women’s FC v Durban Ladies (King Zwelithini Stadium, 3pm); City Lads v UWC (Isaac Wolfson Stadium, 3pm); Mamelodi Sundonwns Ladies v University of Pretoria (Lucas Moripe Stadium, 6pm);