OweDowns ubonga ozakwabo ngokushesha ajwayele eqenjini
U-KEANU Cupido weMamelodi Sundowns obonga ozakwabo ngokuzinza kuleli qembu afike kulona waqala wasokolela ukuthola ijezi njengoba eshaye into ecokeme koweFifa Club World Cup, e-USA
Image: BACKPAGEPIX
UMDLALI wasemuva kwiMamelodi Sundowns, uKeanu Cupido, uncoma ozakwabo ngokwenza izinto zibelula kuyena ekuzinzeni esikwatini saleli qembu elilwela ukunqoba izicoco kuwona wonke amasizini.
UCupido (27) osayiniswe yiSundows ngoJanuwari, esuka kwiCape Town City, udlale imidlalo emibili kuphela yeNedbank Cup ngesizini edlule ngemuva kokujoyina leli qembu lasePitoli.
Kodwa uzithole eboshelwa kuyona yomithathu imidlalo edlalwe yiSundowns koweFifa Club World Cup, e-USA, ngoJuni.
ISundowns engompetha engompetha beBetway Premiership, izovula isizini ka-2025/26 ngomdlalo wasekhaya weMTN 8 neRichards Bay FC, eLucas Moripe Stadium, e-Atterdidgeville, kusasa ngo-6 ntambama.
“Abadlali beMamelodi Sundowns esibafice bekhona kwiMamelodi Sundowns benze kwaba lula kithina esisanda kufika.
Uma uya emdlalweni omkhulu, abadlali (obafica eqenjini) bakutshela ukuthi, yenza okujwayele ungathuki, ngaleyo ndlela izinga lokuzethemba liyenyuka kuwena. Nami-ke yilokho engikwenzile ngenkathi nginikwa ithuba emidlalweni yeClub World Cup.
Lokho kungisize kakhulu ekutheni ngizinze emdlalweni wami wokuqala (bedlala ne-Ulsan HD FC yaseSouth Korea), ngemuva kwalokho izinto zase ziba lula kimina,” kusho uCupido.
Ngaphandle kokusizwa ngozakwabo beSundowns nethimba labaqeqeshi ekuzinzeni kuleli qembu eliyizingqungqulu zebhola eMzansi, uCupido uncoma nothandiweyo wakhe ngokumkhuthaza nokumqinisa idolo ngezikhathi ezinzima elwela ukuthola ukuthola ijezi eqenjini.
“Eqinisweni, bekunzima kimi ekufikeni kwami kwiSundowns kodwa unkosikazi wami wenza izinto zabalula kimina. Ubelokhu esho kimina ukuthi ‘konke kuyenzeka ngoNkulunkulu, uma sekuyisikhathi sakhe, kuzokwenzeka’. Lawo mazwi akhe yiwona abelokhu engiqinisa idolo.
"Ngibona ukuthi ubambe iqhaza elikhulu ekungikhuthazeni ekuqhubekeni nokusebenza ngokuzikhandla. Ngakho ngicabanga ukuthi ukwesekwa kuyinto ebaluleke kakhulu empilweni,” kuqhuba uCupido.
Lo mdlali obanga ijezi noGrant Kekana, uMothobi Mvala noMalibongwe Khoza emuva maphakathi nendawo, uyayiqonda inselelo ebhekene neqembu lakhe kule sizini eqalayo ikakhulukazi ngemuva kokuthatha amehlo abaningi emqhudelwaneni weClub World Cup muva nje.
“Sidinga ukubeka phambili ukunakekela imizimba yethu kuqala singabadlali, engikholwa wukuthi lizokwenza kahle iqembu uma abadlali sebethole ukululama kahle, ikakhulukazi labo abadlala imidlalo eminingi njengoTebza (Teboho Mokoena), obonayo ukuthi basebenze kakhulu.”