ONGUMQONDISI wethimba labaqeqeshi kwiTS Galaxy, uNermin Basic, ubavikele abadlali bakhe abadedele iwini sebeyiphethe ngezandla beguqiswa yiSekhukhune United ngo 3-2 emdlalweni wama-quarterfinal eMTN 8 ngoMgqibelo.
Amaphutha abadlali basemuva kwiGalaxy yiwo ahlinzele ezibini leli qembu obekuyiwe ekhefini lihamba phambili ngo 2-1, lagcina liwashiswa ijezi ekuseni yiSekhukhune koweMTN 8 ePeter Mokaba Stadium, ngoMgqibelo.
Iphutha elenziwe uQobolwakhe Sibande ongumdlali wasemuva kwesokunxele ngesiwombe sesibili, lifane nesipho esiphiwe uVusumuzi Mncube weSekhukhune ozithathele ibhola kalula ezinyaweni kuyena wayolibeka enethini. Yilona igoli eligcine liwelisele iSekhukhune kweyandulela owamanqamu weMTN8.
“Ngemuva kokushaya kwethu amagoli amabili senze iphutha lokuhlala emuva, senza namaphutha aholele ekutheni sidale ama-free kick okuyiwona aholele ekutheni bathole igoli lokuqala (abeSekhukhune). Sizamile ukudlala kangcono ngasekuqaleni kwesiwombe sesibili kodwa sehluleka ukusebenzisa ngendlela amathuba.
Kodwa siqale ukuba nezinkinga ngemuva kokulinyalelwa kwethu ngabadlali basemuva, uKhulumani (Ndamane) noMotaung (Lentswe), kwabe sekuphoqa ukuthi senze izinguquko, sadlalisa nabadlali beDDC (Diski Challenge) abangajwayele ukudlala.
Sibe nephutha elikhulu singenelwa yigoli lesibili kodwa izinto ezinjengalezi ziyenzeka ebholeni,” kusho uBasic, obebambela umqeqeshi u-Adna Beganovic obedonsa isigwebo samakhadi aphuzi.
UBasic ukubalulile ukuthi leli qembu ebelinabadlali abayisithupha kuphela ebhentshini kukhona elisanda kubasayinsa okulindeleke ukuba babhalise maduze kwiPremier Soccer League (PSL).
“Sinabadlali abangakabhaliswa kodwa engicabanga ukuthi emasontweni ezayo sizobe sinabadlali bethu cishe abayisishiyagalolunye abazobe sebebhalisiwe sebekulungele ukudlala. Ngakho ngicabanga ukuthi emidlalweni yethu elandelayo (yeligi) sizobe siyiqembu eliqinile kunaleli,” kuqhube uBasic.
Kubadlali osekwaziwa ukuthi bajoyine iGalaxy kukhona uJefrey Dlamini obedlalela iRoyal AM, Veluyeke Zulu osuka kuMaZulu noSedwyn George obedlelala iHighbury FC.
Leli qembu lisanda kudedela abadlali okubalwa kubo uLindokuhle Mbatha, uKeagan Dolly, uDzanan Zajmovic nabanye. UKamogelo Sebelebele noSphiwe Mahlangu bathathwa yi-Orlando Pirates neSekhukhune ngokwehlukana.
I-The Rockets izovula isizini ka-2025/26 yeBetway Premiership ngokubhekana neDurban City, ngeSonto ngo-3 ntambama eMbombela Stadium, eNelspruit.
Related Topics: