Kufezeke isifiso somqeqeshi bekhuphukela kwiMotsepe League
I-GOODFELLAS FC yaseMzimkhulu ebengompetha baKwaZulu-Natal beSafa Hollywoodbets Regional League ngokuguqisa iTornado FC kowamanqamu amaPlay-Offs esifundazwe abedlalelwa eMpumalanga Stadium, eHammarsdale, ngoMgqibelo
Image: ISITHOMBE SITHUNYELWE
SIGCINE sifezekile isifiso sikaZothani “Tazz” Hlutshwa oyiphini lomqeqeshi kwiGoodfellas FC yaseMzimkhulu engompetha baKwaZulu-Natal beSafa Hollywoodbets Men’s Regional League.
IGoodfellas iguqise iTornado FC yaseMpangeni ngo 4-3 kumaphenathi kowamanqamu wamaPlay-Offs esifundazwe obudlalelwa eMpumalanga Stadium, eHammarsdale, ngoMgqibelo.
Ifinyelele kowamanqamu ngokunenebula iNewcastle Warriors ngo 3-0 kowandulela owamanqamu, iTornado yabhaxabula iWartburg yaseMgungundovu ngo 3-1.
Womane la maqembu, adlale le midlalo yangoMgqibelo yokukhipha ingqwele yesifundazwe esevele ezibekisele indawo kwiSafa KZN ABC Motsepe League kulandela ukuphumelela kumaPlay-Offs abedlalelwa ePort Shepstone, ngoJuni.
“Ngijabule ukuthi isifiso sami sokufaka iqembu kwi-ABC Motsepe League sigcine sifezekile ngoba kade ngangizama. Ngiyambonga kakhulu usihlalo weqembu (uNhlakanipho Mhlawuli) ngokukholelwa kimina ngingumqeqeshi osemncane, anginike ithuba eqenjini lakhe,” kusho uHlutshwa.
“Bese ngizame amahlandla amabili emidlalweni yamaPlay-Offs njengomqeqeshi kungalungi kodwa kulena yesithathu ka-2024/25 esiphuma kuyo, sagcina sifezekile isifiso sami.
Ngike ngaqeqesha i-Eyethu Wanderers eyayimele iHarry Gwala kumaPlay-Offs esifundazwe ayedlalelwa eDundee asangaphumelela, njengoba nangesizini ka-2023/24 singaphumelelanga, sengilapha kwiGoodfellas kumaPlay-Offs esifundazwe ayeseMgungundlovu.
Kodwa kule sizini esiphuma kuyona izinto zigcine zilungile. Ngibonga kakhulu ukwesekwa ngabaphathi beqembu, ukuzinikela kwabadlali nokubambisana kwethu siyithimba labaqeqeshi.
Ukufika kukamqeqeshi uLindokuhle Bhengu kwenze umehluko omkhulu ngasekupheleni kwesizini edlule sesizoyodlala amaPlay-Offs ngenxa yesipiliyoni sakhe. Ngifunde lukhulu kuyena."
Lo mqeqeshi oneminyaka engu-28 waseMzimkhulu, ongomunye wabasebancane, uthe ukulimala kwakhe idolo eseminyaka engu-22 edlalela iqembu lase-Eastern Cape, iThird United, elidlala kwi-ABC Motsepe League, kwamyekisa ibhola kwabe sekokhela uthando lokuqeqesha kuyena.
“Ngemuva kokulimala kwami kwiThird United yase-Eastern Cape, kwase kufanele ngibuyele ekhaya kodwa umphathi weqembu wathi angibe yiphini lomqeqeshi, lwabe seluqala lapho-ke uthando lokuqeqesha kimina.
Sengiqalile ukuzithuthukisa ngolwazi lokuqeqesha njengoba manje sengino-D Licence, maduze ngifuna ukuyokwenza u-C Licence ngoba ngifuna ukukhula ekuqeqesheni, ngibalwe nabaqeqeshi abasezingeni ngomuso," usho kanje.
Lo mqeqeshi uveze ukuthi bazoqinisa izindawo ezimbalwa eqenjini ngabadlali abambalwa abanamava ukumelana nenselelo yokudlala esigabeni seMotsepe League ngesizini ka-2025/26 ezoqala, kodwa bazoqhubeka nokukholelwa kubadlali babo, iningi labo abasebancane.