Iqinise idolo ngeNdebe yoMhlaba iwini yamaBhokobhoko esifazane
ULERATO Makua oqokwe njengomdlali wosuku ngoMgqibelo, eKapa, ejabulela ukuhlabana kwakhe nozakwabo e-Athlone Stadium, eKapa
Image: BACKPAGEPIX
IWINI ehamba nomlando yamaBhokobhoko esifazane ka 41-26 kwiNew Zealand ngoMgqibelo, eKapa, ikhuphule ithemba ngamathuba aleli qembu lesizwe koweNdebe yoMhlaba ezoqala ngo-Agasti 22 kuya kuSepthemba 27 e-England.
Leli qembu lesizwe elithwalise kanzima yiCanada emidlalweni emibili yakamuva eliyidlalele ekhaya, libuye ngamandla kwiNew Zealand kowangempelasonto edlule, kubhoke isiphekepheke esingu-Ayanda Malinga.
AmaBhokobhoko esifazane awakaze adlulele esigabeni somkhumulajezi kwiNdebe yoMhlaba kodwa indlela anqobe ngayo ngoMgqibelo, kwiNew Zealand ishiye abaningi abaxhumene naleli qembu lesizwe begcwele ukuzethemba ngaphambi kokuya e-England.
INew Zealand iyaziwa ngokuzidlela amahlanga cishe kuwona wonke amazwe adlala umbhoxo wesifazane kodwa iNingizimu Afrika ikhombise izimpawu zokulivala igebe ngendlela edlale ngayo.
Kusukela kuqale isizini yombhoxo wesifazane leli qembu laseMzansi kalizange lidlale ngendlela ethembisayo kodwa elikwenze phambi kwabantu baseKapa, kukucacisile ukuthi linawo amava okuhamba ibanga elide kweyoMhlaba.
Kunokuzethemba okungajwayelekile okukhonjiswe amaBhokobhoko umdlalo usuka phansi okwenze iNew Zealand yahlehla.
Kusukela lapho izivakashi azibange zisalithola ithuba lokuphefumula kwazise bezithi zixinwe ngejubane ezimpondweni zibe zidudulwa ngamandla kubadlali baphambili.
Kucacile nokuthi ijubane likaMalinga lizokuba yisikhali esimqoka saleli qembu emidlalweni yeNdebe yoMhlaba.
Kube nguyena uMalinga ovule inkundla nge-try ngaphambi kwekaByrhandre Dolf ayishaye basala bebambe ongezansi bonke abantu abebesenkundleni ngendlela ebinobuchule ngayo.
Nakuba iNew Zealand izamile ukubuya kodwa iqedwe amandla ngamanye ama-try ashaywe nguLibbie Janse van Rensberg, Yanela Ngxingolo, Lindelwa Gwala, Lerato Makua noLuchell Hanekom.