UZwane ubona bedinga isikhathi ekwakheni inqanawe yeqembu

UMQEQESHI waMaZulu FC, u-Arthur Zwane, ugcizelela ukubaluleka kokuba nohlelo oluqondile lokudlala oluwusikompilo eqenjini ngenhloso yokwakha inqanawe ezolwela izicoco. 

UZwane (51) oyinhloko yabaqeqeshi kuMaZulu, ubhekene nomsebenzi wokuhola ngempumelelo leli qembu ngesizini ka-2025/26 nethimba lakhe eligqishe ngoSboniso “Nini” Vilakazi noSimo Dladla.

Lo mqeqeshi ojoyine AmaZulu maphakathi nesizini edlule noVusumuzi Vilakazi abeqeqesha naye ngokubambisana, uwafake kwiTop 8 ngemuva kwamasizini amabili ehluleka wukuzibekisela indawo kwiMTN 8.

“Kufanele sisebenze ngalesi sikwati esinaso engikholwa wukuthi sizodinga wonke umdlali oyingxenye yeqembu, ikakhulukazi njengoba sizoba nemidlalo eminingi kule sizini eqalayo ezothothana eduze neminye ezoba maphakathi nesonto okuzodalwa wukusondezela (eyeBafana Bafana) yokuhlungela iNdebe yoMhlaba nomqhudelwano we-Afcon ozoba ngoDisemba.

Indlela esizoqala ngayo isizini nokuthi isikwati esisihlanganisayo sihlangana kanjani, yiyona ezosinika umkhombandlela ekutheni sizoba naso yini isidingo sokuqinisa iqembu ngewindi likaJanuwari,” kusho uZwane. 

“Abadlali esinabo kuzodingeka bangene ngokushesha esitayeleni seqembu, okubalwa nalaba abasebancane esibakhuphulelele eqenjini elikhulu sibasusa kweleDiski Challenge.

Kubalulekile ukuthi sisayinise abadlali abayilolu hlobo esilufunayo eqenjini, abazokwazi ukungena khaxa esitayeleni sethu sokudlala.  Akusizi ukusayinisa umdlali ngoba eshaye amagoli angu-10 kwelinye iqembu kodwa ongelona lolu hlobo lomdlali esimdingayo eqenjini ngoba ekugcineni uma lowo mdlali iqembu engasalenzeli lutho uyagxekwa ngabalandeli noma kugxekwe thina baqeqeshi uqobo.

“Ngiyakuqonda ukuthi akuzukuba lula ukuhlanganisa iqembu elineningi labadlali abasebancane, kodwa ngesikhathi nesineke, kuyogcina kuhlangene.

Ngakho kubaluleke kakhulu ukuthi iqembu libe nohlelo lwalo oluqondile lokudlala, oluwusikompilo, futhi nethimba labaqeqeshi linikwe ithuba lokwenza umsebenzi walo.

Uma ngingenza isibonelo ngeStellenbosch FC, ayisayinisi nanoma yimuphi umdlali, futhi isalokhu iyibambile indlela yayo yokudlala.

Umqeqeshi uSteve Barker kwamthatha amasizini amane kuya kwamahlanu ukuhlanganisa leli qembu laze laba yile nto eliyiyo njengamanje okuyinto nathi nethimba lami esifisa ukuyenza.”

Usuthu oluzovula isizini yeBetway Premiership ngomdlalo wasekhaya ngo-Agasti 9 ne-Orbit College engomakoti, izoqala ngokududulana neStellenbosch FC koweMTN8 ngeSonto ngo-3 ntambama, eCape Town Stadium, eKapa.