OwaseKZN ufuna ukubuyisa isithunzi sabagijimi besifundazwe koweTotalsports
UBUSISIWE Chamane weDiamond Athletics Club ungomunye wabagijimi besifazane baKwaZulu-Natal abazimisele ngokukhipha amangwevu ukuvikela isithunzi sabagijimi besifundazwe emjahweni iTotalsports Women Race 10km, eThekwini, ngeSonto
Image: SITHUNYELWE
UBONA kusemahlombe abo ukuvikela isithunzi sabagijimi baKwaZulu-Natal, uBusisiwe Chamane, ongomunye wabagijimi bakulesi sifundazwe abazobe beyibambe emjahweni iTotalsports Women Race eThekwini.
Umgijimi ozokwenza irekhodi lomhlaba lika-10km uzohlomula ngo-R1 million kulo mjaho waminyaka yonke, eliphethwe uJebet Ngetich waseKenya kulo nyaka, eGermany.
UChamane (31) uphakathi kwabagijimi abazobe bebhekiwe koweTotalsports Women Race ekusasa eSuncoast Casino, eThekwini.
Lo mjaho waminyaka yonke wabagijimi besifazane kuphela ukwemithathu ehlelwa yiStillwater Sports, eminye igijinywa eKapa naseGoli ngokwehlukana. Umlenze waseKapa uzokuba ngoMgqibelo ozayo ngo-Agasti 9, owaseGoli ube ngo-Agasti 17.
UChamane weDiamond Athletics Club, odabuka KwaMaqumbi, KwaMaphumulo, uza kulo mjaho nje ugcwele ukuzethemba kwazise wenze kahle ebangeni lika-5km ngempelasonto edlule kowe-Athletics South Africa (ASA) Half Marathon, ePhalaborwa, eLimpopo.
Kanti ngo-Ephreli wadla umhlanganiso kwiDurban International Marathon ebangeni lika-10km.
“Ngijabule ngokwenza kahle kwi-ASA Half Marathon ngoMgqibelo odlule, eLimpopo, lokhu kungenza ngiye kulo mjaho wangeSonto weTotalsports nginokuzethemba okukhulu ukuhti ngizokwazi ukwenza kangcono kakhulu.
Ukugijima kwami ebangeni lika-5km kwi-ASA Half Marathon eLimpopo, kunginike isikhathi sokuzilula kahle ngilungiselele lo mjaho weTotalsports engizimisele kakhulu ngokukhipha unyawo kuwona,” kusho uChamane.
Lo mgijimi uyavuma ukuthi ukunqoba kwabagijimi basemazweni angaphandle nabakwezinye izifundazwe kubafakela ingcindezi bengabagijimi baseKZN yingakho bezipophezele ngokukhipha amangwevu kulo mjaho.
“Khona siyazi ukuthi ngeke kube ngumjaho olula lo wangeSonto uma ubheka ukuthi sizobe siqhudelana nabagijmi abenze kahle kweminye imijaho kulo nyaka, kodwa nathi njengabagijimi balapha eKZN kufanele senze okusemandleni ukuvikela isithunzi sesifundazwe, kungalokhu kuchanasa abagijimi basemazweni angaphandle nabakwezinye izifundazwe, ekubeni sikhona nathi.
Yize zikhona izingqinamba nasenhlanganweni yethu, iKZN Athletics, kodwa nathi njengabagijimi sinenselelo yokubhukula sibuyise isithunzi sesifundazwe emijahweni yalolu hlobo,” kuqhuba uChamane.
Lo mgijimi waseKZN usho kanjena nje kubagijimi ababhekiwe emjahweni wangeSonto, kubalwa uJane Chacha waseKenya, odle umhlanganiso emlenzeni waseGqeberha we-Absa Run Your City 10km, ngo-Ephreli.
Abanye ababhekiwe nguTayla Kavanagh waseThekwini weHollywoodbets Athletics Club othathe indawo yeshumi kwi-Absa Run Your City Durban ngoJuni, noNeheng Khatala waseLesotho owalala isithathu koweTotalsports nyakenye eThekwini.