UHunt nezinhloso zokubuyisa udumo lweDurban City
USIHLALO weDurban City, uFarook Kadodia exoxa nomqeqeshi uGavin Hunt no-Ernst Middendorp ongusomaqhinga weqembu ngenkathi kwethulwa abaxhasi abasha baleli qembu benkampani yezimoto, iSupertech Group, izolo eThekwini
Image: DOCTOR NGCOBO
UMQEQESHI weDurban City, uGavin Hunt, usephumele obala ngesifiso sakhe sokubuyisa udumo lwaleli qembu elikhuza ibuya esigabeni esikhulu sebhola laseNingizimu Afrika.
UHunt oyinkunzi emidwayidwa ekuqeqesheni kuleli, ukhulume okokuqala nabezindaba izolo kusukela ethathe izintambo zokuqeqesha kwiCity emasontweni amabili edlule.
ICity beyethula ngokusemthethweni abaxhasi bayo abasha benkampani iSupertech Group, eBellair, eThekwini.
Le nkampani eyengamele izinkampani zezimoto ezihlonishwayo okubalwa kuzona nezeBMW, izoxhasa izikhulu nabaqeqeshi baleli qembu ngezimoto, inike nezaphulelo kubadlali.
“Ngiyazi kahle iDurban City nomlando wayo, ngadlala iminyaka ngibhekene nayo (esadlala kwiHellenic). Yayiyiqembu elikhulu nelihlonishwayo ngeminyaka yo-1970 no-80 eKingsmead Stadium, ilandelwa ikakhulukazi ngabomdabu baseNdiya emidlalweni yangoLwezihlanu ebusuku, engikholwa wukuthi sizokwazi ukwenza okufanayo eChatsworth Stadium,” kusho uHunt, otheleke no-Ernst Middendorp ozoba ngusomaqhinga waleli qembu.
IMaritzburg United iguqule igama ngesizini edlule yaba yiDurban City kulandela ukufudukela kwayo eThekwini, yasebenzisa iChatsworth Stadium. Inqobe isicoco seligi yeMotsepe Foundation Championship.
“Iqembu linaso isisekelo, futhi linesikwati esincane engibona kuzoba lula ukusebenza ngaso yize zikhona izindawo ezimbalwa esisafisa ukuziqinisa lapha nalaphaya njengoba isizini iqala.
Nakuba ngike ngafunda emaphephandabeni ukuthi iqembu lishintshe konke, kuhambe abantu abaningi, kodwa ekufikeni kwami ngifice iningi labadlali ebelikhona ngesizini edlule.
Kule sizini ezoqala inhloso kuzoba wukugxila ekufakeni uzinzo nokwenza okusemandleni ukuwina imidlalo, yize ngikuqonda ukuthi kuzoba nzima ukuthola bonke abadlali esibafunayo ngenxa yemakethe yokuthenga abadlali kwiligi yethu. Sizosebenza ngesinakho, sikhase kancane size sikwazi ukuzihambela. Sincane isikhathi esinaso, kumele sisebenze kanzima kakhulu,” kuqhuba uHunt.
Yize lo mqeqeshi engathandanga ukudalula amagama abadlali asebasayinisile, kodwa kwabazama inhlanhla kukhona uThabo Nodada, uHaashim Domingo noDareen Keet abasuka kwiCape Town City egawulwe yizembe. Kukhona noThulani Hlatshwayo obeqeqeshwa nguHunt kwiSupersport United ngesizini edlule.
Kulindeleke ukuhi izinduku zeCity zibonakale uma isidlala kwiKZN Premier's Cup ngempelasonto, eMhlathuze Sports Complex, eRichards Bay.