Kubhekwe uKamatuka noMoerane kweyeMotsepe Championship

UMGADLI weDurban City, uJoslin Kamatuka, nonozinti we-Orbit College, uSekhoane Moerane, ngabanye babadlali abathwelwe ngeqoma kwabazobanga umklomelo obhekwe ngabomvu uma sekuchonywa uphaphe lwegwalagwala abayibamba kwiMotsepe Foundation Championship ngesizini ka-2024/25.

Kungokokuqala kule sizini emlandweni wePremier Soccer League (PSL) ukwethulwa kweminxa yabadlali abenze kahle esigabeni seChampionship (First Division) kwazise phambilini lesi sigaba esiphakela eseBetway Premiership besiba nomunxa owodwa kuphela okungowe-Top Goal Scorer.

Nokho emiklomelweni yanonyaka iPSL yethule iminxa emithathu okuqokwe kuyona abadlali abazobanga imiklomelo emithathu okungoweMotsepe Foundation Championship Players’ Player of the Season, Goalkeeper of the Season noweYoung Player of the Season. 

UKamatuka uqokwe noBanele Hlophe weJDR Stars noMuzomuhle Khanyi weHungry Lions (osanda kusayiniswa yiStellenbosch FC) kowePlayers’ Player of the Season.

UMoerane uqokwe no-Emile Lako weCasric Stars noDumsani Msibi weDurban City koweGoalkeeper of The Season.

Yize uKhanyi ehambe phambili ngamagoli angu-18 kwiChampionship ngesizini edlule kodwa iqembu lakhe, iHungry Lions, ligcine liphelele endaweni ka-13 kwi-log.

UMoerane, odabuka eLesotho, usize i-Orbit yanyukela kwiPremiership ngokuwina imidlalo yePSL Promotional Play-Offs.

KoweYoung Player of the Season kuqokwe uLuke Baartman weCape Town Spurs, uTeboho Lekhatla weCasric Stars noSiphamandla Mhlongo weMilford FC. 

ULekhatla kubukeka kunguyena osethubeni elingcono kunozakwabo aqokwe nabo kulo munxa kwazise iqembu lakhe, iCasric, liqede endaweni yesithathu kwi-log, lafinyelela nakumaPlay-Offs yize ligcine likhale ngaphansi. 

Isiyonke imiklomelo yeMotsepe Foundation Championship: 

Motsepe Foundation Championship Players’ Player of the Season: Banele Hlophe (JDR Stars); Joslin Kamatuka (Durban City); Muzomuhle Khanyi (Hungry Lions)

Motsepe Foundation Championship Goalkeeper of the Season: Emile Lako (Casric Stars); Sekhoane Moerane (Orbit College); Dumsani Msibi (Durban City)

Motsepe Foundation Championship Young Player of the Season: Luke Baartman (Cape Town Spurs); Teboho Lekhatla (Casric Stars); Siphamandla Mhlongo (Milford FC)