USuthu neBay bangase bafinyeze amazipho kowePremier’s Cup

UKUBA seduze kokuqala komqhudelwano weMTN 8 kungase kuholele ekutheni AmaZulu FC neRichards Bay FC bangabadlalisi abanye babadlali babo abamqoka emqhudelwaneni weKZN Premier’s Cup ozodlalwa namuhla nakusasa, eMhlathuze Sports Complex, eRichards Bay.

AmaZulu, aphekwa ngu-Arthur Zwane, neRichards Bay, ecijwa uRonnie Gabriel noPapi Zothwane ngokubambisana, baphakathi kwamaqembu ayisithupha aKwaZulu-Natal adlala kwiPremier Soccer League (PSL) azozwana amandla kulo mqhudelwano waminyaka yonke wokuzivivinyela ukuqala kwesizini entsha. 

Amaqembu eBetway Premiership AmaZulu FC, Lamontville Golden Arrows, Richards Bay FC neDurban City, azogadulisana namabili adlala kwiMotsepe Foundation Championship, okuyiMilford FC neMidlands Wanderers.

AmaZulu yiwona azovula inkundla namuhla ngo-11 emini, kulandele iDurban City neMilford ngo-2 ntambama.

Kusasa ngo-9 ekuseni, kuzodudulana iMidlands neRichards Bay kowokuqala owandulela owamanqamu, bese kowesibili ngo-12.30 emini kuhlangana amaqembu azonqoba imidlalo yanamuhla.

Umdlalo wamanqamu uzoqala ngo-4 ntambama. 

AmaZulu neRichards Bay yiwona maqembu aseKZN azobe eyibambe kwiMTN 8 ngempelasonto ezayo.

AmaZulu azodudulana neStellenbosch FC ngoJulayi 3, iRichards Bay itholane phezulu neMamelodi Sundowns ngosuku olufanayo.

Yize lo mqhudelwano wePremier’s Cup uyithuba elihle lokuzikala ubukhali nobuthuntu kwamaqembu akulesi sifundazwe ngaphambi kokuqala kwesizini yePremiership neyeMotsepe Championship esiseMome, kodwa ngasohlangothini loSuthu neNatal Rich Boyz kubukeka kungase kube yingozi ukudlalisa kwabo abadlali babo abamqoka kulo mqhudelwano ukugwema ukulimala sekusele kancane baqale umqhudelwano wokuqala omkhulu wesizini ka-2025/26.

Kubukeka womabili la maqembu azoyibamba kwiMTN 8 engase asebenzise injejane, iningi layo eliyibamba kwiDStv Diski Challenge, kanye nabanye abadlali asabahlola abasalwela ukuthola izinkontileka ngaphambi kokuqala kwesizini. 

Isiyonke imidlalo yeKZN Premier’s Cup imi kanje 

Namuhla:

AmaZulu v Golden Arrows (11am); Durban City v Milford FC  (2pm)

Kusasa:

Midlands Wanderers v Richards Bay FC (9am); Amaqembu azonqoba ngoMgqibelo (12pm); Owamanqamu ngo-4pm