UMQHUDELWANO weKZN Premier’s Cup ungase ukhombise inhlansi yokungase kulindelwe emaqenjini aKwaZulu-Natal, adlala kwiPremier Soccer League (PSL) kule sizini ka-2025/2026 okungasensuku zatshwala luqale ushikishi lwayo.
Amaqembu amane eBetway Premiership aseKZN, AmaZulu FC, Lamontville Golden Arrows, Richards Bay FC neDurban City, azogadulisana namabili adlala kwiMotsepe Foundation Championship, okuyiMilford FC neMidlands Wanderers, kulo mqhudelwano ozodlalwa kusasa nangeSonto eMhlathuze Sports Complex, eRichards Bay.
Lo mqhudelwano waminyaka yonke, wasungulwa ngo-2011 nguhulumeni waKwaZulu-Natal ngenhloso yokunika amaqembu esifundazwe adlala kwiPSL ithuba lokuzivivinyela ukuqala kwesizini.
IDurban City enqobe isicoco seChampionship ngesizini edlule, izobe ingomakoti kwiPremiership ngesizini ezoqala, kanti iWanderers yaseMgungundlovu yona izobe ingomakoti kwiChampionship kulandela ukuqeda endaweni yesithathu kumaPlay-Offs kazwelonke eSafa ABC Motsepe League ngoJuni, eGauteng.
AmaZulu neGolden Arrows bazovula inkundla ngo-11 emini, kulandele iDurban City neMilford ngo-1 ntambama.
NgeSonto ngo-9 ekuseni, kududulana iMidlands neRichards Bay. Owandulela owamanqamu uzoba ngo-11 emini, owamanqamu udlalwe ngo-4 ntambama.
Ngaphandle kweBay neCity, AmaZulu neGolden Arrows, abakaphumeli obala ngabadlali ababasayinisile.
Emasontweni adlule, iBay yethule abadlali abangu-11 ebasayinisile, okubalwa kubona uGabadinho Mhango, Thabani Zuke noLindokuhle Mtshali abasuka kwiMarumo Gallants, Golden Arrows neSekhukhune United ngokwehlukana.
Muva nje, iCity esanda kuqasha uGavin Hunt kwesokuqeqesha, isayinise abadlali abahlanu okunguBrooklyn Poggenpoel osuka kwiSuperSport United, Bokang Mokwena osuka kwi-Upington City, uLiam de Kock osuka kwiStellenbosch FC, Darren Keet osuka kwiCape Town City, noFredrick Asare osuka kwi-Asante Kotoko yaseGhana.
KumaZulu nakwi-Arrows kungase kubonakale abadlali abasazama inhlanhla kulo mqhudelwano abanye babo abangase bazitholele izinkontileka. Kulindeleke womabili la maqembu ethule ngokusemthethweni abadlali bawo abasha ngaphambi kokuqala kwesizini ka-2025/26 yePremiership eqala ngo-Agasti 9.
Usuthu ne-The Rich Boys yiwona maqembu okumele nakanjani asebenzise lo mqhudelwano ukuzikala ubukhali bawo ngaphambi kokuyoyibamba kwiMTN 8 ngempelasonto ezayo.
Usuthu luqhathwe neStellenbosch FC ngo-Agasti 3, iRich Boys idudulane neMamelodi Sundowns ngawo u-Agasti 3.
Kanti iWanderers neMilford okuyiwona maqembu esifundazwe adlala kwiMotsepe Championship, lo mqhudelwano kuzoba yithuba elihle lokuzikala nakuwona ngaphambi kokuqala kwesizini yeChampionship ezoqala ngo-Agasti 22.
Related Topics: