UGelant nenselelo yokuvuka nge-ASA Half Marathon
U-ELROY Gelant okubhekeke avuke azithathe, avikele isicoco sakhe kwi-Athletics South Africa (ASA) Half Marathon
Image: BACKPAGEPIX
NGEMUVA kokwehluleka ukuvikela isicoco kwi-Absa Run Your City Durban 10km, u-Elroy Gelant, kubhekwe ukuthi avuke azithathe ngokuvikela isicoco se-Athletics South Africa (ASA) Half Marathon Championships kusasa emini, ePhalaborwa, eLimpopo.
Lo mjaho kazwelonke ohlanganisa neFoskor F21 Half-Marathon, ngowebanga lika-21km no-5km.
Nyakenye, uGelant nguyena owadla umhlanganiso kulo mjaho ebangeni lika-21km, kwabesifazane kwaphuma phambili uGlenrose Xaba ebangeni elifanayo, eGqeberha, e-Eastern Cape. Ngakho bobabili uGelant noXaba abagijmela iBoxer Athletics Club, bangabanye babagijimi ababhekiwe kulo mjaho wakusasa njengoba bevikela isicoco.
UGelant (38) oseyinsephe kwezokugijima uwuqale kahle lo nyaka ngenkathi ephula irekhodi laseNingizimu Afrika lika-42km ngesikhathi sika-2:5 kwiHamburg Marathon eGermany, ngo-Ephreli, nonyaka.
Nyakenye, nguyena odle umhlanganiso emlenzeni we-Absa Run Your City Durban 10km. Nokho wehlulekile ukuvikela isicoco elala isihlanu kulo mjaho onqotshwe nguKabelo Muladuzi.
Kube ngesifanayo kuXaba naye olale isihlanu kulo mjaho waseThekwini, onqotshwe uClare Ndiwa waseKenya kwabesifazane.
Kulo mjaho uGelant uzodlana imilala noThabang Mosiako we-Athletics Central North West noBennet Baloyi weCentral Gauteng Athletics, kanti uXaba kubhekwe ukuthi agadulisane noCacisile Sosibo weCentral Gauteng, onesikhathi esihle esingaphansi kuka-70 minutes kulo mjaho.
Ku-5km, kubhekwe uJerry Motsau ophethe irekhodi lika-300m, ozobe emele i-ACNW. Yena uzobe egadulisana no-Andries Sesedi owake waba ngumpetha waseNingizimu Afrika ku-10 000m noChris Mhlanga.
Kwabesifazane, kubhekwe uKarabo More noSimonay Weitsz be-Athletics Gauteng North, noZanthe Taljaard we-Athletics Vaal Triangle.
“Sibuyela emqhudelwaneni wasekhaya eNingizimu Afrika ngemuva kokwenza kahle kwabagijimi bakithi kwi-Confederation of African Athletics U-18 np-U-20 Championships e-Abeokuta, eNigeria.
"Sifisela impumelelo iLimpopo Athletics engosokhaya abazosingatha lo mjaho we-ASA Half Marathon nazo zonke izinhlaka eziyingxenye yalo mjaho ohlanganisa umjaho we-F21,” kusho umengameli we-ASA, uJames Moloi, ecashunwa yi-website ye-ASA.