OwamaProteas ubheke abasebancane kowamanqamu neNew Zealand
UMSHWIBI wamaProteas, uKwena Maphaka, ngomunye wabadlali abasebancane umqeqeshi uShukri Conrad afuna bakhombise abakufundile kowamanqamu we-T20 TriSeries
Image: BACKPAGEPIX
UTHEMBA ukuthi iqembu lakhe lizobhukula uma selibhekene neNew Zealand kowamanqamu weT20 TriSeries eHarare Sports Club kusasa ngo-1 emini, umqeqeshi weqembu lesizwe lekhilikithi labesilisa, uShukri Conrad.
Yize amaProteas ekwazile ukuyinqoba yomibili imidlalo yawo yamaqoqo neZimbabwe, eyiguqisa ngamawikhethi amahlanu nangamawikhethi ayisikhombisa, ahlulekile wukunqoba iNew Zealand kwemibili yamaqoqo abayidlalile.
Emdlalweni wokuqala iqembu lakuleli linqotshwe ngama-run angu-21, kwathi sebehlangana kowesibili ngoLwesibili, iNew Zealand yanqoba ngamawikhethi ayisikhombisa.
Iqembu uConrad angene nalo kulo mqhudelwano obuphakathi kwalawa mazwe amathathu, liholwa ngabadlali abanamava okubalwa kubona ukaputeni uRassie van der Dussen, Reeza Hendricks, Lungi Ngidi, George Linde nabanye.
Nokho, lo mqeqeshi uphinde wabanikeza ithuba lokuzibonakalisa abadlali abasebancane okubalwa kubona uLhuan-dre Pretorius, Dewald Brevis, Andile Simelane, Kwena Maphaka nabanye.
Uthe akubheke ngabomvu wukuthi bakhombise abakufundile kulo mqhudelwano uma sebebhekene neNew Zealand kusasa.
"Kusobala ukuthi sisabheka abadlali bethu abasebancane esifuna ukuqhubekela nabo phambili. Ngicabanga ukuthi indlela esiqoke ngayo iqembu iyakucacisa lokho. Akusho ukuthi laba esingabakhethanga abasenalo ithuba lokuba yingxenye yeqembu esikhathini esizayo," kusho uConrad.
“Sinomdlalo wamanqamu esizowudlala ngoMgqibelo, futhi wumdlalo omkhulu lowo. Ngalokho angiqondile ukuthi eminye imidlalo esiyidlalile ibingabalulekile kodwa ngikholwa ukuthi owamanqamu uzocacisa kahle ukuthi abadlali bakuliphi izinga.
"Ngijabule kakhulu ngethalente labadlali abasebanacane esinabo, ikakhulukazi kulolu hlobo lwekhilikithi lwe-T20. Bangabadlali abangenza umehluko. Njengoba ngishilo, ngibheke ngabomvu ukubona ukuthi bazothuthuka kanjani."
AmaProteas asahlanganisa iqembu lawo njengoba ebheke eNdebeni yoMhlaba yeT20 ezodlalelwa e-India naseSri Lanka, kusukela ngoFebhuwari kuya kuMashi ngonyaka ozayo.
Iqembu lakuleli lafinyelela kowamanqamu eNdebeni yoMhlaba ye-T20 eyayise-United States nase-West Indies ngonyaka odlule, lanqotshwa yi-India ngama-run ayisikhombisa.