OweShayamoya ufuna bakhiphe unyawo koweDStv Schools Netball

UMQEQESHI weqembu lesikole le-netball iShayamoya High School, uBerto Mnikina, unethemba lokuthi ezakhe zizokwenza okungcono kakhulu emqhudelwaneni kazwelonke wakulo nyaka weDStv Schools Netball Challenge.

IShayamoya ekhuza ibuya okwehlandla lesibili kokazwelonke, ngesinye sezikole ezintathu zaKwaZulu-Natal ezimele isifundazwe kulo mqhudelwano kazwelonke okuzoqhuthana kuwona ezingu-36 ozoqala ngoLwesihlanu, usongwe ngoMgqibelo, eHoerskool Dr. E.G. Jansen, eBoksburg, eGoli.

Lo mqhudelwano udlala ngokwama-streams amabili, Ubuntu Stream noBotho Stream. Ubuntu ibophele iningi lezikole zasemalokishini nasemakhaya, uBotho ibophele iningi lezikole zasemadolobheni futhi yiyona ligi eshubu ngokwezinga. 

Kulo mqudelwano uBotho ibophele amaqembu ezikole angu-19, uBuntu ibophele angu-17.

IShayamoya yaseKokstad izibekisele indawo ngokudla umhlanganiso kuBotho Stream, kwathi iThembalethu Senior Secondary nayo okungeyaseKokstad neMasibonisane High School yaseMtubatuba bazibekisela indawo kwekazwelonke ngokufinyelela kowamanqamu kuBuntu Stream. IThembalethu idle umhlanganiso emidlalweni ebiseHoy Park, eThekwini, ngoJuni. 

“Kuyangithokozisa ukuthi nakulo nyaka sikwazile ukufinyelela ezingeni likazwelonke, ngakho emqhudelwaneni wakulo nyaka sifuna ukwenza okungcono kakhulu kunangonyaka odlule. Sifuna ukuphumelela saziwe, sibeke isikole sethu nendawo yaseKokstad ebalezweni kulo mdlalo we-netball.Sisebenze kanzima kusukela unyaka uqala kuze kube manje, ngakho sekuyisikhathi sokuthi sikhiphe amangwevu ethu kulo mqhudelwano,” kusho uMnikina, onguthisha kulesi sikole saseShayamoya, eKokstad.

“Siyakuthakasela kakhulu okwenziwa yiMultiChoice ngokuxhasa i-netball ezikoleni, ikakhulukazi ezikoleni zasemakhaya ezingenayo ingqalasizinda efana neyezikole zasemadolobheni. 

Ngihlale ngibakhuthaza abadlali bami ukuthi kufanele bazimisele ngaso sonke isikhathi emqhudelwaneni yalolu hlobo ngoba ngeke wazi ukuthi ubona okubhekile. Emiqhudelwaneni enjengalena kubakhona izinhloli zamaqembu esizwe kanti futhi ukwenza kahle kungabavulela amathuba okuthola nemifundaze ezikhungweni zemfundo ephakeme."

Umnikina unxuse nabanye abaxhasi ukuthi basike iphethini kuMultichoice ngokuxhasa inetball.

“Isifiso sami ukubona abaxhasi besondela ekuxhaseni i-netball ikakhulukazi ezikoleni zasemakhaya. Izikole zasemakhaya njengakoKokstad nakwezinye, ikakhulukazi lezo ezaziwa ngo-no fee (okungakhokhwa kuzo), zikuthola kunzima ngisho ukuhambela imiqhudelwano ezingeni lezifunda ngenxa yokuthi abafundi bakhona babuya emindeni ehlwempu. Ngakho siyafisa kakhulu ukubona abaxhasi besondela, bangaxhasi nje kuphela amaqembu aphumelele ukuyomela isifundazwe,”kusho uMnikina.

Nyakenye iKhombindlela High School yaseMpangeni - engaphumelelanga nonyaka ukuzibekisela indawo kwekazwelonke - yiyona edle umhlanganiso kokazwelonke yeSchools Netball Challenge, kuBuntu Stream, kuBotho Stream ubhedu lwadliwa yi-Afrikaanse Hoer Meisieskool yasePitoli.

Imidlalo yeDStv Schools Netball Challenge:

NgoLwesihlanu: 

Framesby v Thembalethu (8am); Thembalethu v PHS (9.30pm); Thembalethu v Chief Ampie (1.15pm);

Khanyisa v Masibonisane (8am); Masibonisane v Duineveld (1.15pm); Masibonisane v Kgapamadi (4.15pm)

Shayamoya v Lambalati (9.30pm); AHMP v Shayamoya (1.15pm); Pearson v Shayamoya (4.15pm); Ramotshere v Shayamoya (5.45pm)