OweDurban City uchitha 'eyezinkunzi ezimbili' esibayeni esisodwa

USIHLALO weDurban City, uFarook Kadodia, akaboni kuzoba khona ukungqubuzana phakathi kwabaqeqeshi ababili, uGavin Hunt no-Ernst Middendorp, abazosebenza ndawonye ethimbeni labaqeqeshi lali qembu ngesizini ezoqala ka-2025/26.

Ngemuva kokukhushulelwa esigabeni seBetway Premiership ngokudla isicoco seligi yeMotsepe Foundation Championship, iCity ikhombe indlela uSimo Dladla yaqasha uGavin Hunt olandelwe nguMiddendorp osanda kugawulwa yizembe neCape Town Spurs kwiChampionship. UMiddendorp wengamele ithimba labaqeqeshi. 

Ebuzwa ngabezindaba uKadodia ngesinqumo sokudidiyela laba baqeqeshi abangakaze basebenze ndawonye phambilini, uthe ngokuqonda inselelo leli qembu elingase libhekane nayo ngesizini yalo yokuqala kwiPremiership, ubone kufanele alande abalolu hlobo.

UHunt uzakhele igama eminyake edlule ngokunqoba izicoco eziningi emaqenjini okubalwa kuwona iSuperSport United neBidvest Wits.

Ngakolunye uhlangothi, uMiddendorp odabuka eGermany, useqeqeshe amaqembu ehlukene kuleli okubalwa iKaizer Chiefs, Lamontville Golden Arrows, Bloemfontein Celtic neCape Town Spurs.

“Abantu abaningi kubamangazile ukuqasha kwethu ngasikhathi sinye uGavin Hunt no-Ernst Middendorp, kodwa ngenxa yokuqonda inselelo esizobhekana nayo ngesizini ezayo, sibone kufanele ukuba sithole abaqeqeshi abanjengalaba.

Bobabili laba qeqeshi sibaqashe ngezizathu ezahlukene ngokomsebenzi wabo abazowenza. UMiddendorp usuka kude neqembu, uyayiqonda indlela okusetshenzwa ngayo kuleli qembu kusukela lisabizwa ngeMaritzburg United.

Ngimlandele ukuzokwenza umsebenzi ohlukile wokuzokuba ngumqondisi wezokuqeqesha nokuhlela izinhlaka zeqembu leDDC (DStv Diski Challenge) okungolunye uhlangothi olubaluleke kakhulu eqenjini,” kusho uKadodia.

Uphundule umbuzo wokuthi akuzukuba khona yini ukungqubuzana kwezinkunzi ezimbili esibayeni esisodwa ngokudidiyela laba qeqeshi ethimbeni elilodwa labaqeqeshi.

“Ucacile umsebenzi wokuba ngumqondisi wabaqeqeshi nowokuba yinhloko yabaqeqeshi. Ngakho angiboni kuzoba khona ukungqubuzana nokugxambukela emsebenzini womunye phakathi kwalaba baqeqeshi, ngoba ngamunye uyawuqonda umsebenzi wakhe,” kusho uKadodia.

Lesi khulu sikubeke kwacaca ukuthi kule sizini ezoqala okuzobe kuyisizini yabo yokuqala kwiPremiership, bazolwela uzinzo.

“Ngingasho ngokukhulu ukuzithoba ukuthi ngesizini yokuqala ngeke silwe namaqembu amakhulu, sizozabalazela ukuba nozinzo. Ngesizini elandelayo sizolwela ukunqoba izicoco," kusho uKadodia.

Khonamanjalo: Leli qembu selimemezele ngokusemthethweni abadlali abane eselibasayinisile, okungunozinti uFredrick Asare odabuka eGhana, umgadli uTrevor Mokwena osuka kwi-Upington City, umdlali wasesiswini uBrooklyn Poggenpoel osuka kwiSuperSport United, nonozinti uDarren Keet osuka kwiCape Town City.