UQhogi uveza okumhehe kwiNsingizini Hotspurs
UMQEQESHI weNsingizini Hotspurs, uMandla Qhogi, nethimba lakhe labaqeqeshi elibophele noSimon Ngomane ongusomaqhinga lizodlala okokuqala kwiCaf Champions League ngesizini ezayo ka-2025/26
Image: NSINGIZINI HOTSPURS FACEBOOK
UKUBA nezinhloso ezinkulu kwabaphathi beqembu iNsingizini Hotspurs yikhona okuhehe uMandla Qhogi ekuthatheni izintambo zokuqeqesha leli qembu elidlala kwi-Eswatini Premier League njengoba lizodlala okokuqala kwiCaf Champions League ngesizini ezayo ka-2025/26.
UQhogi uqashwe yiNsingizini ngoJuni, kulandela ukwehlukana kwakhe neMilford FC edlala kwiMotsepe Foundation Championship, eqale ngokumumisa ngoFebhuwari.
Kuleli qembu laseSwatini elingompetha be-Eswatini Premier League, uQhogi uzoyibamba noNhlanhla Hlongwa oyiphini lakhe, u-Asiphile Nkabane oyi-fitness coach, noTebogo Modise oyi-video analyst, bobathathu asebenze nabo kwiMilford.
USimon “Phiri” Ngomane ongumakadebona ekuqeqesheni ungusomaqhinga waleli qembu.
“Abaphathi beHotspurs bahlale benezinhloso zokudlala emiqhudelwaneni emikhulu futhi banezinhloso ezinkulu ngeqembu. Leso ngesinye sezizathu ezingenze ngakhetha ukuthatha umsebenzi wokuqeqesha leli qembu.
"Ithuba elinjengaleli engilinikwe yiHotspurs yithuba elihle obekungelula ukulenqaba, ikakhulukazi ngoba kuyivela kancane ukuqeqesha iqembu elidlala kwiCaf Champions League.
"ENingizimu Afrika kufanele uqeqeshe iMamelodi Sundowns noma i-Orlando Pirates ukuze uthole ithuba lokuqeqesha kwiCaf Champions League ngakho yithuba elihle kakhulu leli kimina ukuthi ngikhule njengomqeqeshi,” kusho uQhogi odabuka eMondlo, eVryheid, kodwa okhulele eZola, eSoweto.
Lo mqeqeshi osebenze isikhathi eside ezinhlakeni zabadlali abasakhula ze-Orlando Pirates, okubalwa neqembu layo leDStv Diski Challenge, uthi ubone kufanele alinxenxe ithimba abesebenza nalo kwiMilford ukuzobenza nalo kuleli qembu laseSwatini.
“Isizathu sokuthi ngibalande uHlongwa, uNkabane noModise, yingoba ngiyawazi amagalelo abo futhi besinezinhloso ezinkulu nabo kwiMilford kodwa-ke ezigcine zingaphumelelanga ngenxa yezizathu ezingaphezu kwamandla ethu.
"Ngakho ukusebenza kwami nabo futhi kuleli qembu ngikholwa wukuthi kuzokwenza umsebenzi wami ungabi nzima kakhulu ngoba ngizobe ngisebenza nabantu abayiqonda kangcono indlela yami yokusebenza.
"Ngaphandle kwalokho, ukusebenza nomqeqeshi osemnkantshubomvu, uSimon Ngomane, ngibona kuzokwenza umehluko omkhulu eqenjini ngenxa yamava akhe ebholeni,” kuqhuba uQhogi.
“Silindele isizini enzima ku-2025/26 njengoba sizobe sidlala kwiChampions League futhi sibheke nokwenza kahle nakwiligi njengoba singompetha abavikela isicoco. Kanti-ke futhi kunamaqembu aqinisa izikwati zawo ngabadlali abanohlonze ngenxa yokufaka kwawo imali.”