UMokoka uthembisa ukubuya ngeHollywood ehluleka kowe-Absa
U-STEPHEN Mokoka okhale ngaphansi ebhekiwe kowe-Absa Run Your City Durban 10km ngeSonto, eThekwini, usebheke ukubuya ngeHollywoobets Athletics 10km ngo-Agasti, eThekwini
Image: BACKPAGEPIX
INSEPHE yomgijimi, uStephen Mokoka, iyivumile induku ikhala ngaphansi emjahweni i-Absa Run Your City Durban 10km, yathembisa ukubuya ngonyaka ozayo.
UMokoka (40) weHollywood Athletics Club ubengomunye wabagijimi abebethwelwe ngeqoma kulo mjaho onqotshwe nguKabelo Mulaudzi ngesikhathi sika-27:41. Kwabesifazane umhlanganiso udliwe uClare Ndiwa waseKenya ngo-30:50 ngeSonto, eThekwini.
Nokho le nsephe yomgijimi odabuka eMahikeng, eNorth West, eyehluleke ukungena ngisho kwabayishumi bokuqala, ingena endaweni ka-13, ibibekelwe isamba sika-R100 000 ngabaStillwater Sports engabahleli balo mjaho uma ezikwazi ukwenza isikhathi esingu-27:48 okuyirekhodi lomhlaba lama-Masters.
UMulaudzi unqoba lo mjaho nje, ubevele eze kuwona ebuya ekunqobeni umlenze waseKapa we-Absa Run Your Ciy obungoMeyi.
“Ekuqaleni komjaho ebangeni lika-3km, ngiqale ngesivinini, kwathi maphakathi nomjaho sabe sesehla isivini sami, ekubeni emjahweni waseKapa ngangiqale ngesivinini esiphansi maphakathi nomjaho ngabe sengikwazi ukusenyusa.
"Ngicabanga ukuthi kuzofanele ngisebenze ekulungiseni isivinini sami maphakathi nomjaho emjahweni olandelayo.
“Ngisenonyaka ukulungisa amaphutha engiwenzile kulo mjaho, engizimisele ngokubuya kuwo ngonyaka ozayo ngizokwenza kangcono kakhulu kunengikwenzile,” kusho uMokoka, owalala isithathu kwi-Absa Run Your City Cape Town 10km eKapa, ngoMeyi.
Uveze ukuthi usezozilolongela ukuyoyibamba kwiHollywoobets Athletics 10km ezoba ngo-Agasti 31, neSanlam Cape Town Marathon yebanga lika-42km ezoba ngo-Okthoba 19.
“Kulo nyaka angifuni ukuzixaka ngemijaho emikhulu yamabanga amade, ngigxile kweka-10km nowe-marathon owodwa, okuyiCape Town Marathon. Ngizoqala ngeHollywoobets 10km ngo-Agasti, eThekwini,” kuqhuba le nsephe ephethe irekhodi lomhlaba lika-50km eyaliqopha ngo-2022 kwiNedbank Runified, eGqeberha.
I-Absa Run Your City egijinywa imilenze emihlanu emadolobheni amahlanu okuyiGqeberha, iKapa, iTheku, iPitoli neGoli, isisalelwe yimilenze emibili okungowasePitoli ozogijinywa ngo-Agasti 24, nowaseGoli ngoSepthemba 24.