OweJuventus nethemba lokuthatha amehlo koweDStv Champ of Champs
USIHLALO weLadysmith Juventus, uLindelani Mabaso, unethemba lokuthi ukuqhubeka nokwenza kahle kwaleli qembu emqhudelwaneni iDStv eKasi Champ of Champs kungase kuvulele abadlali ithuba lokuthatha amehlo ezinhloli zamaqembu ePremier Soccer League (PSL).
Image: facebook
USIHLALO weLadysmith Juventus, uLindelani Mabaso, unethemba lokuthi ukuqhubeka nokwenza kahle kwaleli qembu emqhudelwaneni iDStv eKasi Champ of Champs kungase kuvulele abadlali ithuba lokuthatha amehlo ezinhloli zamaqembu ePremier Soccer League (PSL).
IJuventus edlala kwiSafa Uthukela Hollywoodbets Regional League, ibalwa namaqembu aqhamuka ezifundazweni ezahlukene zaseNingizimu Afrika adlala kulo mqhudelwano, oqale ngoJulayi 17 ozosongwa ngoJulayi 27, ePitoli.
Leli qembu laseMnambithi eliqeqeshwa uJabulani Shezi, selifinyelele kowandulela owamanqamu elizowudlala ngoLwesine. Owamanqamu uzoba ngeSonto.
IDStv Kasi Champ of Champs eyasungulwa ngo-2022, ivezwa bukhoma kuSuperSport u-202 no-209.
“Ngemuva kokuwina kwethu i-Osizweni Soccer Tournament, eNewcastle, ngoDisemba, iqembu lethu liqale ukunakwa ngabantu abaningi, kwabakhona nabadlali bethu abathatha amehlo amanye amaqembu adlala ko-ABC Motsepe League.
Kanti ukudlala kwethu kwiKasi Champ of Champs ngikholwa wukuthi yikho osekuzokwandisa kakhulu amathuba abanye babadlali bethu okuthatha amehlo amaqembu ePSL, njengoba sesivele siqalile ukuthola izingcingo ngabadlali bethu abenza kahle kulo mqhudelwano
Kumanje unozinti wethu, uNtuthuko Sithole, wenza ezibukwayo nokungenzeka aqokwe njengonozinti ovelele kulo mqhudelwano. Lokho kungamphendlela ithuba lokubonwa ngamaqembu ePSL,” kusho uMabaso, ongudokotela ngokomsebenzi osungule leli qembu ngo-2022.
IJuventus eguqise ngo 2-0 iSkepe Nketole yaseTembisa evikela isicoco, izibekisele indawo kweyandulela owamanqamu ngokunenenebula iMasokolara FC yaseLimpopo ngo 3-0.
Ithole ithuba lokudlala kwiKasi Champ of Champs ngokuba ngompetha be-Osizweni Soccer Tournament okungumqhudelwano webhola waminyaka yonke odlalelwa Osizweni, eNewcastle, ngoDisemba.
Nyakenye, iYoung Chiefs yaseNewcastle idlale okokuqala kulo mqhudelwano yahlulwa kuma-quarterfinal.
UMabaso obambisene nosomabhizinisi okubalwa kubo uXolani Zwane, uSabelo Dlamini noSiyabonga Dlamini, uveze ukuthi ngemuva kwalo mqhudelwano banezinhloso zokuthenga iqembu elidlala kwiSafa ABC Motsepe League.
“Inhloso enkulu wukubona isifunda Uthukela siba neqembu elidlala esigabeni seFirst Division (Motsepe Foundation Championship), ngakho ngemuva kwalo mqhudelwano sinezinhloso zokuthenga isitifiketi seqembu le-ABC Motsepe League ngoba ngokwekhono labadlali esinabo njengamanje asikholwa wukuthi kufanele siqhubeke nokudlala esigabeni seHollywoodbets Regional League nangesizini ezayo,” uphethe kanje uMabaso.