AweSasol azoqala isizini engakayitholi imihlomulo yangesizini edlule

PHEZU kokuba iningi lamaqembu eSafa KwaZulu-Natal Sasol League edonsa kanzima ngenxa yokungazitholi izibonelelo nemihlomulo yawo yangesizini edlule, kodwa azoyiqala isizini ka-2025/2026 ngempelasonto.

Ihhovisi leSafa KwaZulu-Natal likhiphe uhla lwemidlalo yokuqala yesizini yeSasol League ngoMsombuluko. Lokhu kuwubufakazi bokuthi luyaqala ushikishi lwemidlalo yalesi sigaba esiphakela iligi kazwelonke yebhola labesifazane kuleli, iHollywoodbets Super League. 

Imidlalo yeSafa KZN izoqala ngeSonto ngo-1 ntambama ezinkundleni ezahlukene. Kule sizini le ligi yesifundazwe yehlukaniswe ama-stream amathathu okungu-Stream A, Stream B noStream C ngenhloso yokuthi adlalele eduze, angabi nemidlalo eminingi yasekuhambeni ukugwema izindleko zokuthutha. Amaqembu abehlukaniswe ama-stream amabili kuphela.

UWeisy Mothoalo, oyimenenja yeNewcastle Chess engelinye lamaqembu azodlala imidlalo yawo yokuvula isizini ngeSonto, uthe yize besakweletwa yiSafa kodwa kuzomele badlale.

“Akukho okunye, kuzomele sidlale. Sizothintitha esinakho emapheketheni kudlalwe. Kungconywana kulokhu ngoba ama-stream bawahlukanise aba mathathu, okusho ukuthi izoba mncane kakhulu imidlalo yasekuhambeni. Kuzomele sidlale sizimisele ngoba ngo-Okthoba kuzomele kudlalwe amaPlay-Offs kazwelonke,” kusho uMothoalo. 

Le midlalo yeSasol League iqala nje, akukacaci ukuthi isivumelwano seSafa nabaxhasi bale ligi, iSasol, sizovuselelwa yini njengoba ekuqaleni kukaJulayi, le nkampani kawoyela ikhiphe isitatimende esiqinisekisa ukuphela kwesivumelwano sayo nale nhlangano eyengamele ibhola eNingizimu Afrika.

Iningi labaphathi bamaqembu abakhulume neSolezwe ekuqaleni kukaJulayi, bazwakalise ukukhathazeka kwabo ngalokhu kwazise kwenzeka lokhu nje, basakweletwa yiSafa imali yezibonelelo zezindleko zokuthutha nemihlomulo yamaqembu enze kahle ngesizini edlule. Kulokhu kubalwa amaqembu aqede phezulu kwi-log, kuze kuyofika kwaqede endaweni yesishiyagalombili kwi-stream ngasinye.

Imidlalo yeSafa KZN Sasol League:

NgeSonto ngo-1pm:

Stream A: 

Newcastle Chess v PS Amabhaca Ladies (Osizweni Stadium); Khananites v Mshwathi Future Stars (Arbor Park); DUT Midlands v Dlala Ntombazane (Endumiso Field)

Stream B: 

Sunflower WFC v All Stars (Mpumalanga Stadium); Toti Ladies v UKZN FC (Adams College); Romans United v UniZulu Ladies (Umhlathuze Sports Complex)

Stream C: 

Lindelani Ladies v Diski Pros Academy (TBC); DUT Coastal v Sapphire Ladies (Steve Biko Field); Darnall v Westville United (Twinnie Park)