Uzofihlwa kusasa obeyisikhulu se-netball
OBEYIPHINI likamengameli kwiKZN Netball, uDkt Themba 'TV' Mkhize, odlule emhlabeni kuleli sonto.
Image: KZN NETBALL
UZOFIHLWA kusasa obeyisikhulu seNetball esifundazweni saKwaZulu-Natal, uDkt Themba Vusumuzi Mkhize.
Inkonzo yomngcwabo kaMkhize (65), izoba seMhlathuze Sports Complex, eRichards Bay, kusasa kusukela ngo-9 ekuseni.
UMkhize, obeyiphini likaMengameli weKZN Netball, udlule emhlabeni ngoMsombuluko. Uke waba ngumengameli wayo le nhlangano iminyaka eminingi phambilini.
Ngaphandle kwalokho ubeyilungu lesigungu esiphezulu seKZN Sport Confederation, aphinde abe ngumnikazi nomqeqeshi weZiphozonke Netball Club.
Ubeseneminyaka engaphezu kwamashumi amathathu ezinikele kwezemidlalo futhi engumholi ohlonishwayo ekuphathweni nasekuthuthukisweni kwezemidlalo.
Udlale indima enkulu ekuqiniseni izinhlaka ze-netball. IKZN Netball Super League yasungulwa ngaphansi kobuholi bakhe ngo-2011.
Le ligi enezigaba ezintathu zamaqembu abesifazane nezimbili zamaqembu abesilisa isikhiqize abadlali, abaqeqeshi nonompempe asebefinyelele ezingeni lamazwe ngamazwe, futhi iyaqhubeka nokukhula.
“Silahlekelwe uDr Mkhize obekade eyingxenye ebalulekile yeKZN Netball. Silahlekelwe yilungu elibalulekile, hhayi kwi-netball kuphela, kodwa kwezimidlalo jikelele, ngenxa yendima ayidlalile ekukhuliseni ezemidlalo ezehlukene esifundazweni saKwaZulu-Natal,” usho kanje umengameli weKZN Netball, uGugu Ngema.
UMphathiswa wezeMidlalo, ubuCiko namaSiko uMntomuhle Khawula naye uzwakalise isililo ngokudlula emhlabeni kukaMkhize.
“Sigqemeke ingozi engeqiwa ntwala, ikakhulukazi ngasohlangothini lwe-netball. Ubaba uMkhize ungomunye wabantu abasuka ne-netball ekuqaleni, wawumela lo mdlalo, kwaze kwasuka nomqondo wokuthi i-netball umdlalo wabantu besifazane. Ngineqiniso ukuthi i-netball yaKwaZulu-Natal naseNingizimu ikuleli zinga ngenxa yamagalelo akhe,” usho kanje uKhawula.