Umphathi kaNxakanxaka ubheke esinye isicoco koweDundee July
IHHASHI, uNxakanxaka, elathathwa lihalaliselwa nguNdunankulu waKwaZulu-Natal, uThami Ntuli, ngemva kokudla umhlanganiso kwiNkandla May ligitshelwe nguNdumiso Masondo, liphakathi kwamahhashi abhekiwe kwiDundee July namuhla, eDundee
Image: NKANDLA MAY FACEBOOK
UMPHATHI wehhashi uNxakanxaka, uMlamuli “Mdubane” Gama, uthi sezigawulwe zabekwa ngokuyoyibamba emjahweni iDundee July Traditional Rural Horseracing ozogijinywa namuhla eNdumeni Horse Track, eDundee.
Lo mjaho wodumo wamahhashi omtelebhelo ohlelwa yiKwaZulu-Natal Rural Horse Racing Horse Association noxhaswe nguMnyango wezeMidlalo KwaZulu-Natal, ugubha iminyaka engu-20 kulo nyaka, kanti isiqubulo sakulo nyaka esithi African Jewel.
UNxakanxaka, okuyihhashi lodumo lase-Utrecht, esifundeni Amajuba, selinqobe lo mjaho amahlandla amaningi. Liphakathi kwamahhashi abhekiwe kulo mjaho omkhulu onesiteki sika-R350 000 okubalwa kuwona uMbayimbayi, uBhulamngoma, uComputer, uMazondo namanye.
UMbayimbayi, okuyihhashi lasesifundeni iZululand, yilona elivikela isicoco salo mjaho elawunqoba nyakenye.
Nokho uGama osengumakadebona emijahweni yomtelebhelo KwaZulu-Natal naseNingizimu Afrika, ugabe ngoNxakanxaka noMazondo, womabili okungamahhashi akhe asefomini enhle kulo nyaka.
La mahhashi ayizelamani, eza emjahweni nje, athelwe ngezibonkolo, njengoba kuyiwona aphumelelile kwiNkandla May yakulo nyaka, lapho khona uNxakanyaka edle umhlanganiso uMazondo wathatha isibili.
“Nginethemba elikhulu lokuthi uNxakanxaka nomfowabo uMazondo bazoqhubeka lapho begcine khona kwiNkandla May naseLesotho, njengoba nakhona eLesotho bedle umhlanganiso ngokulandelana, uNxakakanxaka ephuma phambili uMazondo elala isibili.
Amalungiselelo ahamba kahle kakhulu, womabili amahhashi ayimiqemane, akulungele ukuyogadulisana nezimbangi zawo emjahweni engikholwa wukuthi uzoba ngosezingeni eliphezulu kakhulu kwazise sibheke inselelo enqala kwamanye amahhashi esiyodlana nawo imilala,” kusho uGama.
Lo mjaho wodumo oya ngokuya udlondlobala unyaka nonyaka, kubhekwe ukuba ungenise izigidi zamarandi ikakhulukazi edolobheni iDundee, elingaphansi koMasipala wesifunda uMzinyathi nakwamanye amadolobha akhelene nalesi sifunda.
Ngesikhathi wethulwa lo mjaho ngoJuni, uMnyango wezeMidlalo oholwa nguMntomuhle Khawula, kwathiwa uphethe isiteki sika-R3,1 million kanti unemijaho engu-12, okuhlanganisa nemibili yabesifazane, njengoba omkhulu ugabe ngesiteki sika-R350 000.
Ngaphandle komtelebhelo wamahhashi, kuzobuye kube nombukiso wengqephu khona namhlanje kusukela ngo-10 ekuseni lize liyozilahla kunina, kanti izolo bekulindeleke kume yonke into edolobheni eDundee njengoba kuzokuba nomviliyelo (parade) wamahhashi noMr and Mrs Dundee.
Kubhekwe uNdunankulu wesifundazwe, uMnuz Thami Ntuli nezimeya ezahlukene zomasipala abakhelene nesiFunda uMzinyathi namaphethelo, ekuzimaziseni lo mcimbi.