Sebelinde isinqumo se-ASA abakhala 'ngokuntshontshwa' kokhetho lweKZNA
USELLO Mokoena osethimbeni elifuqa umkhankaso wokuthi ukhetho lweKZN Athletics luqalwe phansi ngenxa yokungaqhutshwa kwalo ngendlela ngoJuni, uthi sebelinde isinqumo se-ASA ngendlela eya phambili
Image: KZN ATHLETICS
OWAYENGUMENGAMELI weKwaZulu-Natal Athletics (KZNA), uSello Mokoena, uthi sebelinde isinqumo se-Athletics South Africa (ASA) ukuthola indlela eya phambili ngesinqumo sayo ngokhetho lobuholi beKZNA olube nezihibe ngenyanga edlule.
UMokoena ungomunye wabane ababegaqele isikhundla sokuhola iKZNA abakhale ngaphansi okhethweni obeluseThekwini, ngoJuni 14. Umhlanganiso udliwe nguSteve Mkasi obuyele okwehlandla lesibili esikhundleni sokwengamela le nhlangano yezokugijima esifundazweni.
Kulolu khetho, uMkasi obebenga noMandla Mngomezulu, Chris White noRomeo Hulane, uvotelwe ngamakilabhu angu-36 kwangu-95 agcina evotile ekubeni kuvela ukuthi iKZNA inamakilabhu acela ku-200.
Njengoba phambilini kuvele ukuthi ithimba labahlulwe okhethweni lifuna ukuya enkantolo, uMokoena oliholayo usekuqinisekisile ukuthi sebeyihoxisile eyokuya enkantolo.
“Sike sayicabanga eyokuya enkantolo kodwa ngemuva kokuba sesibe nomhlangano namakilabhu asesekayo sagcina siyihoxisa, sabe sesithatha isinqumo sokuthi sibhalele iKZNA kodwa yasiphendula ngendlela enendelelo isitshela ukuthi asiwufundanga kahle umthethosisekelo.
Ngaleyo ndlela sabe sesibhalela i-ASA uqobo, yathi kithina akuxoxiswane, sabe sesivumelana-ke nayo ukuthi makungayiwa enkantolo, sisebenzisa enye indlela.
“Encwadini yasenkantolo bekufanele simangalele iKZN, i-ASA neKZN Sports Confederation, ngenxa yokuthi izingqapheli zayo zazikhona ngosuku lokhetho, zayibona indlela okwaqhutshwa ngayo ukhetho kodwa azangathatha zinyathelo. Yingakho-ke bese sicabanga ukuya enkantolo. Emva kokhetho kwacaca ukuthi kuningi okungahambanga kahle, eqinisweni nje ukhetho luntshontshiwe ngoba uMkasi akavotelwanga ngamakilabhu amaningi esifundazwe.
"Esikufunayo manje wukuthi ibhodi elikhona njengamanje leKZNA lihlakazwe, luqalwe phansi ukhetho,” kuqhuba uMokoena, othe ubuholi be-ASA bekulindeleke lutheleke (ngoLwesithathu) ukuzohlangano neKZNA.
“Ngemuva kwezingxoxo, i-ASA ebe nazo neKZNA, sizobe sesilindela ukuzwa kuyo ngesinqumo ezosithatha ngendlela eya phambili, icacise ukuthi ukhetho luqalwa phansi noma kwenziwa njani ngalo.
"Iyasikhathaza le nto yemidonsiswano ngoba ibuyisela emuva ezokugijima esifundazweni. Kumanje abagijimi besifundazwe abenzi kahle emiqhudelwaneni eyahlukene njengoba muva nje, kwi-Absa Run Your City Durban 10km kukhonye abagijmi bangaphandle kwesifundazwe nabokufika.”