OweMidlands akanavalo ngokulahlekelwa yinqwaba yabadlali
UMGADLI ovutha uphondo weMidlands Wanderers, uNkosivumile 'Mageba' Zulu, ungomunye wabadlali leli qembu elizobagcina njengoba lilungiselela ukuyoyibamba kwiMotsepe Foundation Championship ngesizini ezayo, phezu kokulahlekelwa yinqwaba yabadlali besayiniswa ngawePremiership
Image: MIDLANDS WANDERERS FACEBOOK
YIZE belahlekelwe ngabadlali abaningi abasayiniswe ngamaqembu eBetway Premiership kodwa oyiphini lomqeqeshi weMidlands Wanderers, uThulisani “Gattuso” Latha, uthi banabo abazokwakhela phezu kwabo ukulungiselela isizini ezayo ka-2025/26.
IMidlands ekhushulelwe esigabeni seMotsepe Foundation Championship ngokuphumelela kumaPlay-Offs kazwelonke eSafa ABC Motsepe League ngoJuni, ishiywe ngabadlali abayisikhombisa abasayiniswe ngamaqembu aKwaZulu-Natal adlala kwiPremiership, okuyiLamontville Golden Arrows neRichards Bay FC.
UNtandoyenkoi Mabaso, Sboniso Madonsela, Philani Khumalo, Nhlanhla Gasa, Alwande Booysen noMfanuvela Mafuleka basanda kusayiniswa yiGolden Arrows, kanti uSboniso Madonsela usayiniswe yiRichards Bay ngaphambi kwemidlalo yamaPlay-Offs.
Ngesonto eledlule, leli qembu laseMgungundlovu okulindeleke ukuthi liqhubeke nokusebenzisa inkundla iHarry Gwala Stadium, libe nenhlolokhono evuleleke kubona bonke abadlali abebefuna ukuzama inhlanhla.
“Besivele sikulindele ukuthi abanye babadlali bethu bazothatha amehlo amaqembu ePSL ngenxa yokwenza kahle kweqembu ngesizini edlule, nanokuthi iningi labo lingabadlali abasavunwa kakhulu yiminyaka. Laba badlali esibadedelile basayiniswa ngamaqembu ePremiership kade kuyisikhathi sabo ukuthi bathole amadlelo aluhlaza bakhule ebholeni. Ngakho njengeqembu besingeke sime endleleni yabo.
"Sikholwa wukuthi izikhala zabo sizokwazi ukuzivala ngoba sinabadlali abaningi kuleli qembu esizophembela kubo, kanti-ke futhi kukhona nabadlali esibahlolayo kumanje abanye babo abanamava okudlala kwiMotsepe Championship,” kusho uLatha, oyiphini likaVincent “Masenti” Myeni ongusihlalo weqembu.
“Phakathi kwabadlali abanamava esikwazile ukubagcina, ngibala kubo u-Eugene Nxele, uSihle Mtshali, uSduduzo Dlamini, uMnelisi “Carrot” Ngcongo noNkosivumile “Mageba” Zulu, okungabadlali esikholwa wukuthi bazokwazi ukuqhubeka nokugcina umgqigqo nendlela yeqembu yokudlala. Inhloso yethu ukungalahli indlela yethu yokudlala esiyithatha njengosikompilo lweqembu.”
Abafana Bebatha babalwa namaqembu ayibamba kwiPremier Soccer League (PSL) aKwaZulu-Natal azodlala emqhudelwaneni wokuzifudumezela ukuqala kwesizini, iKZN Premier’s Cup ozodlalelwa eMhlathuze Sports Complex, eRichards Bay ngoJulayi 26-27.