Kuvela umbango wenkontileka uKamatuka ehlukana neCity
UMGADLI, uJoslin Kamatuka, osehlukene neDurban City abambe elikhulu iqhaza ekunqobeni kwayo isicoco seligi yeMotspe Foundation Championship ngesizini edlule, yakhushulelwa esigabeni seBetway Premiership
Image: BACKPAGEPIX
KUVELA eyokungavumelani ngenkontileka entsha njengokuyikhona okuholele ekuhlukaneni kwesethenjwa somgadli, uJoslin Kamatuka, neDurban City esemalungiselelweni okuqala kwesizini entsha ka-2025/26, kwiBetway Premiership.
UKamatuka (33) ongomunye wabadlali ababambe iqhaza elikhulu ekukhushulelweni kwiBetway Premiership kweCity, ngokomthombo waleli phephandaba ongaphakathi kuleli qembu, kubekhona ukungavumelani phakathi kwakhe nabaphathi beqembu ngokuvuselelwa kwenkontileka yakhe.
“UKamatuka akavumelananga nabaphathi beqembu ngabakubeke etafuleni ngenkathi kunezingxoxo zokuvuselelwa kwenkontileka yakhe, kwabe sekuba wukugqabuka kwegodi kanjalo-ke phakathi kwakhe neqembu,” kusho lo mthombo.
Lo mgadli odabuka eNamibia nodlala eqenjini lesizwe, ushaye amagoli angu-15 kuyo imiqhudelwano ngesizini edlule kwiMotsepe Championship, elala isibili kuMuzomuhle Khanyi obedlala kwiHungry Lions okunguyena okhale wemuka neGolden Boot yeMotsepe Championship ngamagoli angu-18, waphinda waqoka emunxeni weMotsepe Foundation Championship Players’ Player of the Season emiklomelweni yePremier Soccer League (PSL) yokuphela kwesizini.
Ngokusho kwalo mthombo, ngaphandle kukaKamatuka odedelwe ngesizathu senkontileka, kunabanye abadlali leli qembu eselibadedelile ngenxa yokuthi abekho ezinhlelweni zomqeqeshi omusha, uGavin Hunt.
Kubona kubalwa uRuzaigh Gamaldien, unozinti uDumisani Msibi, uSanele Gaxa, uSiyavuya Ndlovu, Musa Nkosi, Musa Mdakane, Mphakamiseni Nene, Siphamandla Nzuza, Victor Bakah noVuyo Phewa.
Kanti kwabebebolekiwe babuyela emaqenjini abo, kubalwa uSenzo “Mbhobho” Ndlovu, Siyanda Hlangabeza no-Olwethu Mzimela ababuyele kuMaZulu FC, noMenzi Ndwandwe obuyele kwiMagesi FC, nayo esimchithile ngokungakungavuseleli inkontileka yakhe.
Ethintwa yileli phephanda usihlalo weCity, uFarook Kadodia, ukuqinisekisile ukuthi uKamatuka noGamaldien abaseyona ingxenye yeqembu akangathandanga ukwenaba ngesizathu sokwehlukana kwabo neqembu.
“Ngingakuqinisekisa ukuthi uKamatuka noGamaldien kabaseyona ingxenye yeqembu, bakhona nabanye abadlali esesibakhululile njengoba sisayina abanye ukulungiselela isizini ezoqala.
Kodwa sizokhipha isitatimende maduze, esizocacisa konke ngezinhlelo zethu ukuya phambili,” kusho uKadodia eshaya ngamafuphi.