Amathemba eKZN akwiStars kowe-netball
UMDLALI weKingdom Stars, uNozipho Ntshangase (ophethe ibhola) ngesikhathi bebhekene neLimpopo Lillies kwiTelkom Netball League ngoLwesibili.
Image: NETBALL SA
SEKUCACILE ukuthi iKingdom Stars ilona qembu eselithwele amathemba aKwaZulu-Natal okubuyela esigabeni esiphezulu njengoba isisongwa imidlalo yamaqoqo kwiTelkom Netball League.
IStars, ecijwa nguNompumelelo Mthembu, isendaweni yesine ngamaphuzu angu-21 emidlalweni engu-14 esigabeni sesibili, okusho ukuthi izoba ngelinye lamaqembu amane azodlulela kweyandulela owamanqamu.
Iqembu elizogcina libe ngompetha esigabeni sesibili lizothola ithuba lokulwela ukukhuphukela esigabeni esiphezulu uma selibhekene neqembu elizolala emsileni kwesiphezulu, ngeSonto.
Elinye iqembu laKwaZulu-Natal, iKingdom Queens, lisendaweni yesihlanu esigabeni sesibili ngamaphuzu angu-15 emidlalweni engu-14. Womabili asesalelwe yimidlalo emibili yamaqoqo.
IStars ibuye ngamandla emzuliswaneni wesithathu oqale ngoMsombuluko e-Durban ICC.
Ngawo uMsombuluko iqumbe phansi i-Eastern Cape Comets ngo 54-29, kwathi ngoLwesibili yabhudluza iLimpopo Lillies ngo 71-21.
IQueens inqotshwe yiWestern Cape Tornados ngo 42-41 ngoMsombuluko, ngoLwesibili yashaya iComets ngo 50-45, yaphinde yahlulwa yiNorth West Tshukudu ngo 45-42 ngosuku olufanayo.
La maqembu aseKZN azohlangana kowamaqoqo ozoqala ngo-1pm ngoLwesithathu, lapho iStars izobe ibheke ukuqhubeka khona nomgqigqo esawubambile selokhu kuqale umlenze wasekhaya.
IQueens izodlala owokugcina wamaqoqo neFree State Sonoblomo ngoLwesine ngo-9 ekuseni, iStars isonge eyamaqoqo ngokutholanana phezulu neMpumalanga Sunbirds ngolwesine ngo-5 ntambama.