Umiswe iminyaka emithathu uMhlakwana etholakala nesikhuthazi esingavumelekile
UMGIJIMI, uNkosikhona Mhlakwana, osemiswe iminyaka emithathu engagijimi ngenxa yokutholwa ngabeSouth African Institute for Drug-Free Sport nesikhuthazi esingavumelekile emzimbeni
Image: Isithombe: BACKPAGEPIX
UMGIJIMI waKwaZulu-Natal, uNkosikhona Mhlakwana, kuvela ukuthi umiswe iminyaka emithathu ngemuva kokuba iSouth African Institute for Drug-Free Sport imthole nesikhuthazi esingavumelekile egazini.
Lokhu kuqinisekiswe izolo kwi-website yeSouth African Institute for Drug-Free Sport, okuyinhlangano elwa nokusetshenziswa kwezikhuthazi ezingavumelekeli kwabezemidlalo eNingizimu Afrika.
Kuhlaluke ukuthi uMhlakwana ogijimela iHollywood Athletics Club utholakale nesikhuthazi esaziwa nge-Erythropoietin egazini ngemuva komjaho iTwo Oceans Marathon ngo-Ephreli 5.
Ngokwemigomo yeWorld Anti-Doping Code, i-Erythropoietin iyisikhuthazi esingavumelekile nhlobo kuyo yonke imiqhudelwano yezemidlalo.
“Umgijimi usamukekele isigwebo sakhe seminyaka emine, esigcine sesehliswa siba yiminyaka emithathu ngenxa yokuvuma kwakhe icala lokusebenzisa isikhuthazi esingavumelekile.
Isigwebo sakhe siqale ngoJuni 11, 2025 kanti sizophela ngoJuni 11, 2028,” kucashunwe isitatimende seSouth African Institute for Drug-Free Sport.
UMhlakwana (30) odabuka KwaMathandubisi, eHowick, utholakala nesikhuthazi esingavumelekile nje ubelale isine kwiTwo Oceans Mararathon yebanga lika-56km ngesikhathi esingu-3:11:53 ngo-Ephreli kulo mjaho onqotshwe nguKhoarahlane Seutloalo waseLesotho.
Ngo-2022 waphuma isibili kulo mjaho, kanti nguyena ophethe irekhodi lika-2:59:15 lePrince Mangosuthu Ultra Marathon yebanga lika-52km aliqopha ngo-2021.
Kuthintwa uGeorge Sithole okhulumela iHollywood Athletics Club, uthe: “Ngeke sikwazi ukuphawula lutho ngalolu daba okwamanje ngoba asikasitholi isitatimende esisemthethweni esiqhamuka kwabeSouth African Insitute for Drug-Free Sport.”