UHunt uzokwethulwa namuhla kwabeCity
UMQEQESHI, uGavin Hunt, okulindeleke ukuthi ethulwe kubadlali nasezikhulwini zeDurban City namuhla ekuseni njengoba kunguyena ozothatha izintambo zokuqeqesha leli qembu elisanda kukhushulelwa esigabeni seBetway Premiership
Image: BACKPAGEPIX
KULINDELEKE ethulwe namuhla kubadlali nasezikhulwini zeDurban City uGavin Hunt ozothatha izintambo zokuqeqesha leli qembu elisanda kukhushulelwa esigabeni seBetway Premiership.
UHunt besekunesikhathi emataniswa nokuvala isikhala sikaSimo Dladla ohlukane neCity ngoJuni ngemuva kokuyikhuphulela kwiPremiership ngokuwina iligi yeMotsepe Foundation Championship ekupheleni kwesizini ka-2024/25.
UHunt ongumakadebona kwezokuqeqesha kwiPremiership osenqobe inqwaba yezicoco, ukhonjwe indlela yiSupersport United ngoMashi. Sekungumlando ukuthi nalo leli qembu lasePitoli selidayisiwe njengoba lisanda kuthengwa yizikhulu zeSiwelele FC yaseBloemfontein.
UDladla oshiye iCity ngemuva kokungavumelani nabaphathi baleli qembu ngokuvuselelwa kwenkontileka yakhe, akuphelanga sikhathi esingakanani waqashwa ngaMaZulu FC njengephini lomqeqeshi u-Arthur Zwane.
Ngokomthombo waleli phephandaba ongaphakathi kwiCity, ethimbeni likaHunt azosebenza nalo kukhona uRowen Fernandez ozoqeqesha onozinti. kuvele negama lika-Ernst Middendorp okuthiwa uzokwengamela ithimba labaqeqeshi.
Uzovala isikhala sikaMfanafuthi Gwala obesethimbeni likaDladla elichithiwe.
“Ngicabanga ukuthi sekuphele konke ukuqagela manje ngendaba kaGavin Hunt nokuza kwakhe kwiDurban City, ngoba ngoMsombuluko (namuhla) ekuseni uzokwethulwa kubadlali nasezikhulwini zeqembu, bese ethulwa ngokusemthethweni kwabezindaba ngoLwesibili.
Noma okwamanje ngingeke ngiyiqinisekise eka-Ernst Middendorp, kodwa ekaRowen Fernandez iyona enginesiqiniseko sayo ukuthi nguyena ozoba ngumqeqeshi wonozinti,” kusho umthombo.
Njengoba ithimba ebelisebenza noDladla lihlakaziwe, kuzocaca ukuthi ngobani uHunt azosebenza nabo kwiCity.
Kanti-ke futhi kusazocaca maduze ukuthi yibaphi abadlali iqembu elizobagcina nelizobakhulula ebuholini bukaHunt onendlela yakhe yokudlala nohlobo lwabadlali akholelwa kubo.
UFernandez owake waba ngunozinti weKaizer Chiefs eminyakeni edlule, uzobe esekhuza ibuya kwiCity asebenza kuyona iseyiMaritzburg United ngaphambi kokuthi ifudukele eThekwini kulandela ukulaxazwa kwayo nguMasipala uMsunduzi eMgungundlovu.
UMiddendorp oseke waqeqesha amahlandla amabili kwiCity, usanda kwehlukana neCape Town Spurs ahluleke wancama wukuyihlenga ezembeni ngesizini edlule kwiChampionship.