OweDurban Ladies usameseka umqeqeshi phezu kokudonsa kanzima
UMQEQESHI weDurban Ladies, uSiphephelo Makhaye, usihlalo waleli qembu uMary-Jane Sokhela osephumele obala ngokumeseka kwakhe phezu kokuba iqembu lisadonsa kanzima kusukela kuqale le sizini kwiHollywoodbets Super League
Image: SIPHEPHELO MAKHAYE FACEBOOK
USIHLALO weDurban Ladies, uMary-Jane "MJ" Sokhela, uyavuma ukuthi ukungenzi kahle kweqembu kule sizini kwiHollywoobets Super League kungenxa yezinto eziningi kodwa njengabaphathi benza okusemandleni ukuthola isisombululo sokubuyisela inqola emzileni.
Leli qembu laseMlaza, eThekwini, elingelinye lamaqembu ebhola labesifazane amadala nelingamavulandlela ebholeni labesifazane eNingizimu Afrika, liyiqale kabi isizini ka-2025 yeSuper League njengoba lisaphikwa yizinto.
Lokhu kufakazelwa wukuhlala kwalo emsileni we-log yalesi sigaba ngamaphuzu amane kuphela emidlalweni engu-13 eseliyidlalile.
Nokho, phezu kwalesi simo uSokhela uthe basazoqhubeka nokumeseka umqeqeshi, uSiphephelo “Meli” Makhaye, nethimba lakhe.
“Zikhona izinto eziningi ezenze saba kulesi simo esikuso njengamanje. Kimina kungumlando ongemuhle ukuthi iqembu libe sendaweni ka-16 kwi-log, selokhu ngafika ebholeni angikaze ngibe kule ndawo.
Kodwa futhi kuze nezifundo eziningi, esithe uma sihlala phansi nethimba labaqeqeshi sibukisisa ukuthi kukuphi lapho silahleke khona, yini esingayenzanga kahle okufanele silungise kuyona.
Siphezu kwalezo zinhlelo-ke manje ngokuthemba ukuthi imiphumela izoshintsha ukusuka manje kubheke phambili. Engingakuqinisekisa khona wukuthi iDurban Ladies ayizukudliwa yizembe, sizolwa, senze okusemandleni ukuhlala kule ligi,” kusho uSokhela, osengumakadebona ebholeni labesifazane.
“Esikuqaphelile wukuthi emidlalweni eminingi esisayidlalile kule sizini, iyingcosana esihlulwe kuyona ngoba singadlalanga kahle. Basuke belidlale lonke ibhola kodwa ekugcineni baphume enkundleni behluliwe. Yingakho ekuhlaleni kwethu phansi nethimba labaqeqeshi kukuninigi esikuhlahlelile ukuzama ukuthola isisombululo kusukela ekugadleni kwethu nasekuvaleni kwethu emuva.
Sinethemba lokuthi ngalesi sikhathi sekhefu sizokwazi ukulungisa amaphutha, sibuyele emidlalweni sesiyiqembu elenza kangcono,” kuqhuba uSokhela.
IDurban Ladies esanda kuqoka uThami Dladla njengephini likaMakhaye, izobuyela ensimini ngomdlalo wasekhaya ne-University of Pretoria, ngoJulayi 12 eSugar Ray Xulu Stadium, eClermont.
Imidlalo eminingi yeSuper League isathathe ikhefu ngenxa yokuthi abanye abadlali bamaqembu adlala kulesi sigaba baseqenjini lesizwe, iBanyana Banyana, ezoyibamba kwi-Women’s Africa Cup of Nations (Wafcon) ezoqala ngoMgqibelo isongwe ngoJulayi 26, eMorocco.