Kuyalwa ojoyine iPirates ngobukhazikhazi beGoli
UMDLALI wasemuva, uNkosikhona Ndaba, osanda kusayasiniswa yi-Orlando Pirates esuka kwiRichards Bay FC abesadlale kuyo amasizini amabili
Image: BACKPAGEPIX
UNKOSIKHONA “Msheke” Ndaba osanda kusayiniswa yi-Orlando Pirates, welulekwa ngokuthatha izimfundiso zasekhaya “azifake ephaketheni” agxile emsebenzini alandelwe wona eqenjini ukugwema izilingo ezihambisana nodumo nobukhazikhazi beGoli.
Lesi yiseluleko sowayengumdlali weKaizer Chiefs, uJustice Sithole, ongusihlalo weNewcastle Warriors ezodlala kwiSafa ABC Motsepe League ngesizini ezayo, asibhekise kuNdaba ongomunye wabadlali abayisishiyagalombili abasanda kusayiniswa yiPirates. UNdaba udlale kwiWarriors ngaphambi kokujoyina iRichards Bay kwiDStv Diski Challenge.
UNdaba (22) wasoSizweni, eNewcastle, odlala emuva kwesokunxele nozakwabo ongumgadli uYamela Mbuthuma waKwaManci, eHarding, asuka naye kwiBay, basanda kuyasiniswa yilezi zingqungqulu zaseSoweto, ezivivela ukuqala kwesizini ka-2025/26.
“Ngenkathi ngimbona edlala komunye umqhudelwano owawudlalelwa Osizweni, akungithathanga sikhathi eside ukumbona uNkosikhona ukuthi uyilolu hlobo lomdlali wasemuva kwesokunxele engimdingayo eqenjini lami.
"Washeshe wazikhombisa izimpawu zokuba ngumdlali onekusasa ebholeni, okuyingakho kungangimangazi okwenzeka kuye njengamanje ngohambo lwakhe ebholeni elikhokhelayo,” kusho uSithole.
“Khona kunzima ukunika umdlali webhola iseluleko, ikakhulukazi uma ejoyina iqembu elikhulu njengePirates kodwa engikwaziyo ngoNkosikhona ukuthi ungumfana ofundiseke kahle ekhaya okubonakala nangendlela aziphatha ngayo.
Kulokhu kufanele kubongwe umama wakhe, engimaziyo nami. Ngakho engikufisayo wukuthi athathe izimfundiso zasekhaya azifake ephaketheni, agweme ezinye izinto ezingamkhipha kulo mzila okufanele ahamba kuwona njengamanje.
Ngenkathi ngisayiniswa yiChiefs (ngesizini ka-2000/01), ubaba wathi kimi angihambe ngiye eGoli, kodwa kufanele ngazi ukuthi eGoli akukona kithi, ngiyele ukuyosebenza.
Ngakho-ke naye uNkosikhona kufanele azi ukuthi eGoli uyele ukuyosebenza, agweme izilingo ezihambisana nodumo.
Nokho, ungumfana olalelayo, engingacabangi ukuthi angashintsha kulokhu ayikho."
UNdaba wabonwa yizinhloli zeBay kwinhlolokhono eyayivulelekile eyayibanjelwe eNkandla, ngo-2022. Wakhushulelwa esikimini esikhulu ngesizini ka-2022/2023. Ngesizini edlule ka-2024/25, waba ngomunye wabadlali abagqamile leli qembu liqeda endaweni yesishiyagalombili kwi-log yeBetway Premiership.
KweZimnyama indawo yasemuva kwesokunxele uzoyibanga noDeon Hotto noYanga Madiba okhushulelwe esikimini esikhulu ngesizini edlule.