Gomora United (1) 2
The Bees FC (0) 1
IGOMORA United yaseGauteng ibe ngompetha bakazwelonke beSafa ABC Motsepe League ngokuguqisa i-The Bees FC yaseMpumalanga, kowamanqamu wamaPlay-Offs kazwelonke obudlalelwa eLucas Moripe Stadium, e-Atteridgeville, izolo ntambama.
Amagoli aqinisekise ukuthi iGomora ikhala yemuka no-R1, 250 million nendebe, avalelwe phakathi uXola Mosia noMoses Mokasia, kwathi eleThe Bees, ethole umthobanhliziyo ka-R600 000, labekwa enethini uSimphiwe Xulu ngesiwombe sesibili.
Womabili la maqembu adlale owamanqamu esevele ekhushulelwe esigabeni seMotsepe Foundation Championship ngokuphumelela kowandulela owamanqamu ngoMgqibelo. IGomora iguqise iMidlands Wanderers ngo 1-0, iThe Bees yashaya iThames yaseNorth West ngo 4-2 sekukhahlelwa amaphenathi.
IMidlands yaseMgungundlovu ebimele iKwaZulu-Natal kule midlalo kazwelonke yokuhlunga, ijoyine iGomora ne-The Bees ekuzibekiseleni indawo kwiChampionship ngesizini ezayo ngokuguqisa ngo 2-1 iThames FC emdlalweni wokulwela indawo yesithathu.
KumaPlay-Offs akule sizini, mathathu amaqembu akhushulelwe kwiChampionship ngenxa yokushoda kwamaqembu kulesi sigaba okudalwe wukuxoshwa kweRoyal AM kwiBetway Premiership ngesizini edlule, kwaholela ekutheni kuqedwe isizini esengu-15 amaqembu esigabeni esiphezulu.
Ukukhushulelwa kweDurban City ne-Orbit College kwiPremiership besuka kwiChampionship, nokugawulwa yizembe kweCape Town Spurs neLeruma United, kuwashiye engu-13 amaqembu akulesi sigaba.
IGomora eqeqeshwa ngumakadebona esigabeni seChampionship, uJohnny Ferreira, ngokukhushulelwa kwayo kwiChampionship ibuyisele isibalo samaqembu aseGauteng kwamathathu kulesi sigaba, ijoyina i-University of Pretoria nePretoria Callies, kulandela ukudayiswa kwe-JDR Stars ethengwe eLimpopo.
Ukungena kwe-The Bees ecijwa uHumphrey “Cellular” Mlwane wodumo kwiKaizer Chiefs, kusho ukwanda kwesibalo samaqembu esifundazweni iMpumalanga njengoba isijoyine iCasric Stars neKruger United.
Kanti ukukhuphuka kweWanderers kusho ukubuyisela isibalo samaqembu aKwaZulu-Natal kwamabili kwiChampionship ngokujoyina iMilford FC, kulandela ukukhuphukela kwiPremiership kweDurban City ebidlala kulesi sigaba ngesizini edlule.
Ngakolunye uhlangothi, ukukhuphukela kwaleli qembu kulesi sigaba kusho ukudamba kwendlala yebhola eMgungundlovu kwazise leli qembu yilona elizosebenzisa iHarry Gwala Stadium, esale ingasenaqembu lePremier Soccer League (PSL) elidlalela kuyo kulandela ukuxoshwa kwe-AM.