ElaseKZN liphume nephuzu kowokuvula kumaPlay-Offs eMotsepe

IMIDLANDS Wanderers ibuye nephuzu emdlalweni wayo wokuqala kumaPlay-Offs kazwelonke eSafa ABC Motsepe League ibambana ngo 1-1 neZizwe United yaseWestern Cape komunye wemidlalo yokuvula ngoLwesibili, eGiant Stadium, eSoshanguve, ePitoli. 

Igoli leMidlands obekuyiwe ekhefini ilandela emuva, livalelwe phakathi nguMlungisi “Mageba” Zulu ngesiwombe sesibili. Liqinisekise ukuthi leli qembu laseMgungundlovu elimele iKwaZulu-Natal kule midlalo yokuhlunga lithola iphuzu ngosuku lokuqala lwemidlalo. 

Komunye umdlalo wokuvula obungoLwesibili, iThames yaseNorth West iguqise iKakamas Juventus yaseNorthern Cape ngo 2-1.

Umdlalo obekufanele ube phakathi kwe-African Warriors neqembu lase-Eastern Cape awudlalwanga ngenxa yecala ebelisaqhubeka elithinta iSinenkani FC osekuqinisekisiwe ukuthi iphume phambili. ISinenkani kulindeleke ukuthi idlale maduzane kule midlalo yokuhlunga eqhubekayo. 

Kulokhu mathathu amaqembu azokhushulelwa esigabeni seMotsepe Foundation Championship. Lokhu kungenxa yokushoda kwamaqembu kulesi sigaba okudalwe wukuxoshwa kweRoyal AM esigabeni seBetway Premiership ngesizini edlule okuholele ekutheni kuqedwe isizini esengu-15 amaqembu ePremiership.

Ukukhushulelwa kweDurban City ne-Orbit College kwiPremiership besuka kwiMotsepe Foundation Championship nokugawulwa yizembe kweCape Town Spurs neLeruma United kuwashiye engu-13 amaqembu akulesi sigaba. 

IMidlands, enenselelo yokuqeda ishobolo lamasizini ayisikhombisa lokubuya nenduku yombangandlala kwamaqembu aKwaZulu-Natal kule midlalo yokuhlunga, izotholana phezulu ne-The Bees yaseMpumalanga ngoLwesithathu ngo-12.30 emini.

Lona wumdlalo obalulekile kuleli qembu laseMgungundlovu okudingeka libuye namaphuzu aphelele ukuzibeka ethubeni elihle lokuqeda iphezulu kuGroup A eqhathwe kuwona neZizwe ne-The Bees. 

Imiphumela yemidlalo yangoLwesibili yamaPlay-Offs kazwelonke eSafa ABC Motsepe League: 

Thames 2-1 Kakamas Juventus; Zizwe United 1-1 Midlands Wanderers