UGlenrose ulobizela umlando kwiSpar Grand Prix
UMPETHA weSpar kwiSpar Durban Women’s 10km Challenge, uGlenrose Xaba, ophahlwe ozakwabo uDiniya Abaraya noSelam Gebre, ngemuva kwalo mjaho obuseKings Park Athletics Stadium, eThekwini, izolo
Image: ROGAN WARD
USHA amashushu ngokungena emabhukwini omlando womjaho iSpar Women’s 10km Grand Prix Series, uGlenrose Xaba, oqhubeke nefomu yakhe enhle ewina iSpar Durban Women’s 10km Challenge izolo, eKings Park Athletics Stadium, eThekwini.
UXaba (30) weBoxer Athletics Club uwine lo mjaho ohlanganisa nebanga lika-5km obungenelwe ngabagijimi abangu-12 000 okubalwa kubona nabanohlonze. Ukhale wemuka no-R33 000 edla umhlanganiso ngesikhathi esingu-31:54
Ushiye uDiniya Abaraya wase-Ethiopia ogijimela iNedbank Running Club olale isibili ngo-32:09, nongene endaweni yesithathu uSelam Gebre naye ongowase-Ethiopia weNedbank ngesikhathi esingu-32:25. Bobabili bathole imithobanhliziyo ka-R25 000 no-R20 000 ngokwehlukana.
I-Spar Women’s Challenge yakulo nyaka ibingekhethekile njengoba lo mjaho ugubha iminyaka engu-35 wasungulwa. Waba ngowokuqala ogijinywa ngabesifazane bodwa eNingizimu Afrika usungulwa ngo-1990.
UXaba odabuka eSecunda, eMpumalanga, ubevele eze kulo mjaho ethwelwe ngeqoma ngenxa yefomu evuthayo akuyo selokhu kuqale lo nyaka. Ukudla umhlanganiso kwakhe emjahweni wayizolo, kusho ukuthi useshaye intambo kwemithathu yebanga lika-10km kulandelana. Omunye wayo yi-Absa Run Your City 10km ebiseKapa, ngoMeyi.
“Kuyisifiso sami esikhulu ukuthi ngiwine iSpar Grand Prix Series okwesithathu, ngingene emabhukwini omlando alo mjaho njengo-Irvette van Zyl noRene Kalmer. Kodwa lokho kuzocaca ngemuva komjaho womlenze wesine weGrand Prix ozoba seGqeberha (ngoSepthemba) ukuthi ngiyaphumelela yini ukukwenza lokho. Ngizoqhubeka ngisebenze kanzima.
Esengigxile kukhona kusukela manje wumjaho olandelayo, i-Absa Run Your City 10km engizoyigijima khona lapha eThekwini, ngoJulayi 13, enginethemba lokuyiwina ngandise amaphuzu azongibekisela indawo kwi-10 000m kwiWorld Athletics Championships, eTokyo, ngoSepthemba,” kusho uXaba oqeqeshwa yinsephe, uCaster Semenya.
Umjaho weSpar uyimilenze eyisihlanu. Ugijinywa emadolobheni amahlanu akuleli, okuyiKapa, eThekwini, ePitoli, eGqeberha naseGoli.
Imilenze emibili seyigijinyiwe eKapa naseThekwini, njengoba sekusele emithathu okungawasePitoli ngo-Agasti 2, eGqeberha ngoSepthemba 27, naseGoli ngo-Okthoba 5.
Emjahweni ngamunye umgijimi uthola amaphuzu, kuthi oqede enamaningi kunabanye uma seyisongiwe imijaho, agixabezwe ngo-R200 000 ohambisana nonyanyavu lwemoto yohlobo lwe-Hyundai.
Umpetha womjaho uthola amaphuzu awu-20 bese ehlanganiswa uma sekusongwe imijaho kukhishwe umpetha kazwelonke weGrand Prix Series.