Ngeke sijabule singakawuqedi umsebenzi: owe-Orbit

UMQEQESHI we-Orbit College, uPogiso Makhoye, uxwayisa abadlali bakhe ngokugajwa yinjabulo kuze kweqe kulandela ukuzibeka ethubeni lokukhuphukela esigabeni seBetway Premiership, ngemuva kokuguqisa iCasric Stars emdlalweni wamaPSL Promotion Play-Offs ngempelasonto.

I-Orbit eshaye iCasric ngo 1-0 wegoli likaLethabo Modimoeng ngoMgqibelo, eSolomon Mahlangu Stadium, KwaMhlanga, isethubeni elingcono kakhulu kunezimbangi zayo kule midlalo yokuhlunga njengoba isizihola phambili ngamaphuzu amahlanu. Ilandelwa yiCape Town City ngamabili, kube yiCasric ngamathathu.

Lokhu sekukhomba ukuthi i-Orbit ezodudulana neCity ngoLwesithathu e-Olympia Park, eRustenburg, ngo-3pm, isidinga iphuzu kulo mdlalo wayo wokugcina ukuze izongena  kwiPremiership yize kusasele nomunye umdlalo ozodlalwa yiCity neCasric ngoJuni 30.

“Bekuvele kuyiqhinga lethu ukuthi singadlali ibhola elihle (emdlalweni wangoMgqibelo) ngenxa yenkundla ebesidlalela kuyo.

Njengoba besiye kulo mdlalo singakangenelwa goli, inhloso bekuyikho ukuthi sithole igoli okuyinto egcine yenzekile, nesijabulisayo ukuthi sigcine siwunqoba umdlalo,” kusho uMakhoye.“Njengoba siyobhekana neCape Town City, sidinga ukubeka umoya phansi singatatazeli, abadlali bethu bangagajwa yinjabulo kuze kweqe ngoba asikawuphothuli umsebenzi.

Njengoba izinto zivuna thina njengamanje, kudingeka sibeke umoya phansi, singavumeli isilingo sokuthatha izinto kancane ngoba sinomdlalo omkhulu ngoLwesithathu okudingeka sibuye namaphuzu kuwona.

Kulo mdlalo wasekhaya sidinga sidinga kakhulu ukwesekwa ngabalandeli bethu ukuze sikwazi ukufeza isifiso sabo neseqembu,” kuqhuba uMakhoye. 

Ukunqoba kwe-Orbit kuqongise ingcindezi kwiCity esilahle amaphuzu emidlalweni emibili esayidlalile kule midlalo yokuhlunga esisongwa. Kowokuqala ibambane nayo i-Orbit ngo 0-0 eKapa, kowesibili yabambana ngo 1-1 neCasric ngoLwesithathu.

Lokhu sekukhomba ukuthi leli qembu laseKapa linengcindezi enkulu yokuyinqoba yomibili le midlalo emibili elisalele, okungowangoLwesithathu ne-Orbit nowangoJuni 30 neCasric, eKapa, ukuze libuyele kwiPremiership ngesizini ezayo. 

I-Orbit neCasric abaqede endaweni yesibili neyesithathu kwi-log yeMotsepe Foundation Championship ngesizini edlule, bazabalazela ukukhuphukela kwiPremiership, balandele iDurban City edle isicoco seChampionship. ICity eqede endaweni ka-15 kwi-log yePremiership, izabalazela ukungagawulwa yizembe.

Imidlalo esele yamaPSL Promotiom Play-Offs ePSL: 

NgoLwesithathu:

Orbit College v Cape Town City (Olympia Park, 3pm )

NgoJuni 30:

Cape Town City v Casric Stars (Cape Town Stadium, 3pm)