Bathwele ngeqoma abaseKZN kwiSA National Karate Tournament
U-ANDILE Manci (okhahlelayo) ungomunye wamakarateka aKwaZulu-Natal okubhekeke bakhiphe unyawo koweSA National Kyokushikai Karate Tournament, eSibusisiwe Hall, eMandeni, ngoJulayi 4-5
Image: SHIHAN GUMEDE WHATSAPP
AMEHLO azothi njo kumakarateka aKwaZulu-Natal ekukhipheni unyawo emqhudelwaneni kazwelonke we-karate, iSA National Kyokushinkai Karate Tournament, ozobanjelwa eSibusisiwe Community Hall, eMandeni, ngoJulayi 4-5.
Kulo mqhudelwano kazwelonke okubhekana kuwona amakarateka aqhamuka ezifundazweni zakuleli ezehlukene, kubhekwe kakhulu awaseWestern Cape, Eastern Cape, Gauteng, Free State neKwaZulu-Natal, okuyizona zifundazwe ezaziwa ngokuba nezibabuli zabadlali bekarate kuleli.
Angu-350 amakarateka aqhamukisa ezigabeni kusukela kumajuniya, Under 55kg, Under 65kg, Under 70kg, Under 80kg no-open kulo mqhudelwano womkhalambazo, ozoba i-full contact (uqinathambo) ne-semi contact.
Nokho iKZN eyaziwa ngokudlisela ogageni iningi lezifundazwe zakuleli emiqhudelwaneni kazwelonke, yiyona izobe imelwe ngamakarateka amaningi kunezinye izifundazwe kwazise izobe imelwe angu-150.
Ukukhonya kwalesi sifundazwe emiqhudelwaneni yomkhalambazo kufakazelwe ukudla kwaso umhlanganiso kulo mqhudelwano iminyaka ilandelana ngo-2022, 2023 nango-2024.
UShihan Bongani Gumede, oyiphini likamengameli weKwaZulu-Natal Karate Federation, uthe balindele izinga eliphezulu kulo mqhudelwano.
“Njengoba iKwaZulu-Natal kuyiyona engosokhaya abasingethe umqhudelwano kubhekwe lukhulu kuyona ikakhulukazi njengoba yaziwa kakhulu ngokuba namakarateka asezingeni eliphezulu, nokwenza kulindeleka izinga eliphezulu kulo mqhudelwano.
Ngaphandle nje kokubamba iqhaza kulo mqhudelwano, amakarateka azobe ebambe iqhaza azozibeka ethubeni elihle lokuzitholela amaphuzu okuzibekisela indawo ekuklelisweni namakarateka azoya kwiWorld Open Full Contact Karate Championships ezoba seJapan ngo-2027,” kusho uGumede, osekomitini likazwelonke leKarate South Africa (KSA).
KwiSA National Kyokushinkai Karate Tournament eyayiyibanjelwe ePort Shepstone ngo-2022, iKZN yiyona eyakhonya, nokuyikho okwenza nasemqhudelwaneni wanonyaka kubhekwe ngabomvu ukuthi lesi sifundazwe sizokwazi yini ukwenza okufanayo.
Phakathi kwamakarateka abhekiwe emqhudelwani wanonyaka kubalwa kuwona uSamkelo Mkhize, Khayelihle Mkhize, no-Ayanda Gwala kwabesilisa ku-open.
Kwabesifazane kubhekwe uNontobeko Phungwayo noGugulethu Mngomezulu ku-open.