USphuzo ukhuthazwa yimpumelelo kamkhaya wakhe okwiPirates

UMDLALI wasesiswini kwiRichards Bay FC, uLindokuhle “Sphuzo” Zikhali, usephumele obala ngokukhuthazwa ngumkhaya wakhe, uMbekezeli “TLB” Mbokazi, ongomunye wabadlali abasencane abafike kwezwakala ngesizini edlule ka-2024/25 kwiBetway Premiership. 

UZikhali (20) odabuka KwaShikishela, eMtubatuba, ungumkhaya kaMbokazi (19)  we-Orlando Pirates ongowaKwaNibela, eHluhluwe, ngaphansi kwesifunda uMkhanyakude.

Bobabili laba badlali abakhombisa ukuba nekusasa ebholeni, bakhushulelwe ezikimini ezinkulu zamaqembu abo ngesizini ngesizini edlule besuka kwaweDStv Diski Challenge.

UZikhali ukhushulelwe kweseBay ekuqaleni kwesizini edlule, uMbokazi wakhushulelwa kwesePirates maphakathi nayo. 

UMbokazi odlale imidlalo ewu-19, washaya igoli elilodwa kuyo yonke imiqhudelwano, ufike kwezwakala eqenjini lePirates elifinyelele kowandulela owamanqamu weChampions League lafinyelela nakowamanqamu eNedbank Cup. 

Ngeledlule, ushaye into ecokeme edlala umdlalo wakhe wokuqala eqenjini lesizwe, iBafana Bafana ngesikhathi iguqisa iMozambique ngo 2-0 kowobungani ePeter Mokaba Stadium, ePolokwane. 

“Ngidlalile noMbekezeli ezikwatini zaseMkhanyakude kumaSalga Games, nangenkathi siwina amaSalga ngo-2022, eNewcastle, sasidlala naye. NakwiMtuba All Stars ngidlale kancane naye ngaphambi kokuba ngiye kuMkhambathi FC, kwi-ABC Motsepe League. Ngakho ukumbona ekuleli zinga akulona njengamanje esedlala nakwiBafana Bafana, kuyangikhuthaza kakhulu nami nabanye abafana bangakithi eMkhanyakude ukuthi nami ngingakwenza lokhu akwenzayo uma ngilisebenzisa ngendlela ithuba engilinikwayo eqenjini lami,” kusho uZikhali odlale imidlalo ewu-16 washaya amagoli amabili kuyo yonke imiqhudelwano ngesizini edlule.

UZikhali oyibamba enkabeni yenkundla, ujoyine iRichards Bay ngoMashi, nyakenye, esuka kwiBlack Leopards edlala kwiMotsepe Foundation Championship. Udlale izinyanga ezimbalwa eqenjini leNatal Rich Boys leDiski Challenge, wakhushulelwa esikimini esikhulu.

“Ukunikwa kwami ithuba eqenjini elikhulu leRichards Bay ngesizini edlule kungikhuthazile, ngazibophezela ekuqhubekeni nokusebenza ngokuzimisela kakhulu kunakuqala ngesizini ezayo njengoba ngikholwa wukuthi kukhona lapho okusafanele ngenze kangcono khona ukuze ngifinyelele ekubeni yilo mdlali engifisa ukuba nguye ebholeni elikhokhelayo. 

"Ngaphandle kwalokho, ukuphumelela kwethu ukuqeda kwi-Top 8 kusho lukhulu kimina nozakwethu, kuyinkomba yokusebenza ngokuzinikela nokubambisana,” kuqhuba uZikhali ofike kwezwakala kuleli qembu eliqeqeshwa nguPapi Zothwane noRonnie Gabriel.