USibisi neseluleko kuNdamane ofunwa elase-Europe
ISITOBHA seTS Galaxy, uKhulumani Ndamane, okuvela ukuthi sesithathe amehlo eqembu laseRomania, iFSCB
Image: BACKPAGEPIX
UDIYO Sibisi usekhiphe iseluleko asibhekise kumkhaya wakhe ongumdlali wasemuva kwiTS Galaxy, uKhulumani “Mtara” Ndamane, okuvela ukuthi usethathe amehlo amaqembu amakhulu aseGauteng neqembu lase-Europe.
UNdamane (21) waKwaMoya, eSahlumbe, udlale umdlalo wakhe wokuqala eqenjini lesizwe, iBafana Bafana, ngesikhathi ibambana ngo 0-0 neTanzania kowobungani ngeledlule ePeter Mokaba Stadium, ePolokwane.
Lo mdlali wasemuva maphakathi nendawo ojoyine iGalaxy ngesizini edlule esuka eqenjini leKaizer Chiefs elidlala kwiDStv iDiski Challenge, ufike washaya into ecokeme kuleli qembu laseMpumalanga eliqede isizini lisendaweni yesihlanu kwi-log yeBetway Premiership. Udlale imidlalo engu-27 kuyona yonke imiqhudelwano ngesizini edlule ka-2024/25.
Kuvela ukuthi uNdamane usethathe amehlo eFSCB yaseRomania, edlalelwa uSiyabonga Ngezana owayedlalela iKaizer Chiefs.
“Okokuqala nje engifisa ukukusho wukuthi kuyangijabulisa ukubona umfana wasendaweni yangakithi eSahlumbe, enza kahle ebholeni elikhokhelayo, okuyinkomba yokuthi akugcinanga nje ngathi kuphela, bayavela nabanye abafana esifundeni sasoThukela.
Ngokwami ukubona, uKhulumani useqenjini elikahle kwiTS Galaxy ngenxa yokuthi umphathi wayo, uTim Sukazi ungumuntu onolwazi olunzulu ngebhola osebenze kakhulu ngabadlali namaqembu ehlukene, ngisho namaqembu aphesheya imbala. Ngakho ngikholwa wukuthi kungaba umbono omuhle ukuthi aye e-Europe uma ithuba livela kunokujaha ukuya emaqenjini amakhulu aseGauteng. Ukudlala e-Europe kungaba kahle kuyena ngoba unonyawo oluhlukile futhi uvunwa wubude kanti neminyaka isamvuma. Kuzofanele athathe iseluleko sikaSukazi ngoba ngeke amlahlekise,” kusho uSibisi owazakhela igama emaqenjini okubalwa kuwona iFree State Stars, Mamelodi Sundowns neMaritzburg United (esiyiDurban City) eminyakeni edlule.
Eyokufunwa kukaNdamane yiqembu lase-Europe ivela nje, akukapheli sikhathi esingakanani uzakwabo abeyibamba naye odongeni lwasemuva kwiGalaxy, uSamukelo Kabini, ngoMashi esayiniswe yiqembu laseNorway, iMolde FK.
Usihlalo weGalaxy, uSukazi, wakubeka kwacaca ekhuluma nezindaba ekuqaleni kwalo nyaka ukuthi abadlali bakhe abasebancane ufuna ukubasa e-Europe kunokubadayisela amaqembu ePremiership.