Akasekho uGidla Mpanza wodumo lwe-Ireland neBush Bucks
U-AMOS "Gidla" Mpanza owaduma eminyakeni eyibamba kwi-Ireland FC neDurban Bush Bucks udlule emhlabeni ngesonto ngeledlule
Image: SITHUNYELWE
KUDLULE emhlabeni, u-Amos “Gidla” Mpanza, owazakhela igama emaqenjini aKwaZulu-Natal ayedlala kwiNational Professional Soccer League (NPSL) neNational Soccer League (NSL) eminyakeni edlule okubalwa kuwona i-Ireland FC neDurban Bush Bucks.
UMpanza (62) wakwa-C, KwaMashu, eThekwini, odlule emhlabeni ngoLwesine ngemuva kokugula, wayengumdlali wasesiswini owadlala kwi-Ireland yaKwaMashu ngeminyaka yo-1980 ngaphambi kokudlulela kwiBush Bucks.
Wayeseqenjini leBush Bucks, Amathol’amnyama, elalingagayelwa mphako neladla isicoco seligi yeNSL (eseyiPSL) ngo-1985 neJohn Player Special (JPS) ngo-1987, elaliqeqeshwa uClive Barker. Lalibophele izihlabani okubalwa kuzona uMlungisi “Professor” Ngubane, Calvin “Mkhonto KaShaka” Petersen, Bernet Gondwe, Majuba Magwaza (ongasekho), ukubala abambalwa.
UMpanza ubalwa nabadlali besizukulwane esidala sezihlabani zebhola ezidabuka KwaMashu ezalibeka ebalazweni leli lokishi eminyakeni edlule. Lesi sizukulwane sishaya ngabadlali okukhona kuzona uHenry “Mthofi” Khumalo (ongasekho) Lucky “Oskhosh” Molefe, Julius “Gonondo” Chirwa (ongasekho), Joel “The Horse” Faya (ongasekho), Tsepo “Marazor” Ntsoane nabanye.
Inkonzo yesikhumbuzo sikaMpanza izoba KwaMashu Sports Centre, ngoLwesine ngo-3 ntambama. Uzofihlwa ngoMgqibelo emathuneni aseRedhill, eThekwini.